Historia


Un bista riba innovacion den enseñansa

Cu e binida di Status Aparte na 1986, Aruba a conoce un cambio den su structura estatal. Cu e cambio aki, Departamento di Enseñansa Aruba (DEA) a haya e tarea pa desaroya un maneho di enseñansa di Aruba y pa crea un sistema di enseñansa propio cu ta refleha mas e identidad social, cultural y historico.

1986 – 1990

Den e periodo 1986-1990 a traha na e maneho nobo, e maneho propio pa Aruba su enseñansa. A tene diferente “hearings” den veld y a publica na 1988 e SHO-nota Renobacion di Enseñansa: prioridad pa futuro.

Esaki tabata un plan di maneho di Stuurgroep Herstructurering Onderwijs cu a fungi como “blueprint” pa e proyectonan di innovacion den enseñansa na Aruba.

E meta di e SHO-nota tabata pa mehora e calidad y organisacion di enseñansa cu enfoke principal riba: alumno, maestro y curiculo.

Hunto cu e SHO-nota, a publica dos otro plan. Nan tabata enfoca riba reforma den capacitacion di maestro: WHO-nota y introduccion di enseñansa bilingual den e scolnan primario: Pa Un Sistema Di Enseñansa Bilingual Na Aruba.


1991 – 1995

Na aña 1989 y 1990 a publica e notanan di maneho pa Educacion Profesional Basico (EPB). A uni tres tipo di scol (Huishoudschool, ETAO y Scol Tecnico) pa nan bira un scol cu un ciclo basico di 2 aña y un ciclo avansa di 2 aña. Na 1995 a start cu e ciclo basico di e scol aki y cu e curiculo nobo. EPB ta forma studiante na un manera profesional y innovativo pa su futuro den mercado laboral.

Despues a continua cu innovacion di Educacion Profesional Intermedio (EPI).

Den e periodo 1991-1995 a cuminsa cu e proyecto Traimerdia. Un Proyecto cu tin como meta fomenta desaroyo y formacion sano di nos muchanan pa medio di cuido y guia di calidad despues di e oranan di scol. Traimerdia ta destina pa mucha cu ta bay scol preparatorio, basico y special. Tur trato cu ta brinda e mucha, ta den un forma organisa y structura cu e gevoel di lag’e sinti su mes na cas. E proyecto aki a duna e mayornan e oportunidad pa ta activo den mercado laboral sin tin extra preocupacion pa nan yiunan.

Tambe a lanta e proyecto pa implementa computer den enseñansa, e asina yama CVOA.


1996 – 2000

Den periodo di 1996-2000 a instala e proyectonan PRIEPEB y SHA.

E nomber PRIEPEB ta para pa: Proyecto Innovacion Enseñansa Preparatorio y Enseñansa Basico. E prome enfoke di e proyecto aki tabata pa traha na un manera colaborativo y “bottom-up” riba innovacion di enseñansa y crea un clima innovativo di enseñansa como un movemento social. Na di dos luga a desaroya cambio na manera un visionario: Un scol cu cuido y cariño cu ta prepara pa bida. Na di tres luga a duna atencion continuo na e dimension etico, emocional y spiritual di cambio den enseñansa. Por ultimo a enfoca riba comprension contextual y historico tanto di enseñansa como di cambio y innovacion educativo, specialmente den e contextonan specifico di decolonisacion di nos pais.

SHA ta para pa: Stuurgroep Herstructurering van het AVO. E proyecto aki tabatin como tarea pa modernisa enseñansa den e nivelnan di mavo, havo y vwo. E enfoke tabata riba curiculo, modernisacion di didactica uza den e nivelnan di enseñansa aki, cuido di e alumnonan y realisacion di e calidad di enseñansa.


2001 – 2005

E periodo 2001-2005 a wordo influencia door di e proyectonan financia pa Fondo Desaroyo Aruba (FDA). Meta di e proyectonan aki tabata pa crea mas y miho enseñansa. Resultado cu e proyectonan mester a trece cu ne tabata:

  1. Un infrastructura nobo pa EPI
  2. Facilidad pa mucha di otro lenga materno cu Hulandes
  3. Programa pa hoben cu ta laga scol na un edad mucho jong
  4. Producto pa sostene un maneho di idioma nobo pa enseñansa

A lanta e proyectonan: Informatie en Communicatie Technologie (ICT), Proyecto Idioma den Enseñansa, Educacion pa Adulto, un maneho nobo pa Enseñansa Superior (Hoger Onderwijs) y e Centro Multidisciplinario (MDC: Multidisciplinair Centrum).

Den e periodo aki Inspectie a reorganisa y enseñansa en general a cuminsa enfoca riba calidad.


2006 – 2011

Na 2006-2009 a sigui e proyecto FDA. E meta general tabata: “Hisa capacidad di desaroyo di nos aparato gubernamental pa aumenta e rendimento di nos enseñansa”. E proyectonan tabata:

  1. Implementa maneho nacional di idioma relevante pa contexto di nos pais Aruba
  2. Di dos y di tres chens pa educacion y formacion eficiente, coherente y integral
  3. Implementa enseñansa academico di calidad na Aruba
  4. Infrastructura ICT pa uzo na scol
  5. Conscientisa pueblo di Aruba tocante importancia di enseñansa

Na 2006-2011 a crea Plan Nacional di Enseñansa (NOP: Nationaal Onderwijsplan).

Na 2010 a traha un plan di maneho 2010-2013. Desde 1986 e enfoke ta dirigi riba contenido di enseñansa. A studia e rol y responsabilidad di cada actor den enseñansa y a realisa cu tin desbalansa den esaki. P’esey a cuminsa atende Desaroyo di Organisacion cu ta aporta y tin un rol grandi den cuido y mantencion di calidad di nos enseñansa.

Den e 25 añanan cu a pasa, e meta di nos pais pa enseñansa tabata pa e ta comparabel den calidad cu cualkier pais desaroya na mundo. Awor e reto di e siguiente 25 añanan ta pa mehora e calidad aki y crea ciudadano ehemplar pa mundo henter.

~ 25 aña na Bo servicio

Scroll To Top
  • © 2011-2018 Department of Education Aruba (DEA)
  • T +297-528-3400
  • F +297-528-3434
  • info@ea.aw