E vakantierooster pa cada aña escolar ta wordo formula conforme e “Regeling lengte schooljaar en maximum aantal vakantiedagen” (AB 1988 No. GT13) y liñanan di guia cu mester tene cuenta cu entre otro e fechanan di examen y dianan oficial di fiesta. E comienso di un aña escolar, e fechanan di examen y e final di un aña escolar ta fluctua hunto cu dianan internacional di fiesta manera Diaranson di Shinishi, Diabierna Santo y Pasco Grandi. Den esaki ta trata na tene mas tanto cuenta posibel cu e mucha, e maestro y e curiculo.
Regeling
- Conforme e “Regeling lengte schooljaar en maximum aantal vakantiedagen” (AB 1988 No. GT13) un aña escolar ta cuminsa oficialmente riba dia 1 di augustus y ta termina riba dia 31 di juli di e aña siguiente.
- E cantidad di dia di vakantie ta fiha na 60 dia pa aña escolar, cual ta inclui 10 dia di fiesta.
Richtlijnen
Entre e liñanan di guia tin stipula cu:
- E mucha tin derecho riba 60 dia di vakantie.
- E prome dos (2) simannan di augustus ta stipula como vakantie; e dialuna y diamars siguiente ta dia di preparacion pa e maestro di scol y generalmente e prome dia di scol ta riba un diaranson of diahuebs.
- Entre e prome dia di scol na augustus y e prome dia di e october vakantie mester tin minimo seis (6) siman di les.
- E kerstvakantie no por ta mas largo cu dos siman y mey (2,5).
- E paasvakantie no por ta mas largo cu dos siman, e.o. pa motibo di e periodo di examen na luna di mei.
- Vakantie grandi ta minimal 5 siman y maximal 6 siman.
- Vakantie grandi ta cuminsa minimal cinco (5) dia di trabou despues di e resultado di “examen tweede (2e) tijdvak”; e fechanan di examen y resultado di examen pa eerste (1e) y tweede (2e) tijdvak ta wordo stipula pa Ministerie van Onderwijs, Cultuur en Wetenschap na Hulanda.
- Mester evita cu cada biaha e mesun dia di siman (por ehempel dialuna) ta cay afo durante un aña escolar/academico.
- Ta purba evita cu mester bay scol pa un solo dia cu ta cay entre dianan liber y weekend; generalmente esaki lo wordo duna como dia di vakantie of ATV-dag.
Si, ta tene cuenta cu e Dianan oficial di Fiesta cu ta keda publica cada aña pa Departamento di Labor (Directie Arbeid). Na momento cu ricibi e aprobacion e dianan oficial di fiesta tambe ta keda publica riba nos website [ea.aw].
Na momento cu Minister di Enseñansa di Aruba aproba un vakantierooster, Departamento di Enseñansa Aruba ta percura pa comunica e vakantierooster oficial aki na e instancia organisador di Carnaval “SMAC”, cu e peticion pa nan tene bon cuenta cu e rooster di scol den nan respectivo planificacionnan y programa.
E instancianan envolvi den e proceso ta Departamento di Enseñansa Aruba (DEA), Dienst Inspectie van het Onderwijs, Sindicato di Maestro di Aruba (SIMAR) y tur Directiva di Scol. E Directiva di Scol ta esun encarga pa representa interes di su scol(nan). E procedura ta como lo siguiente:
- Departamento di Enseñansa Aruba (DEA) ta e instancia responsabel pa formula e concept vakantierooster y pa stipula e ATV-dagen pa Onderwijspersoneel (conform regeling, richtlijnen);
- Dienst Inspectie van het Onderwijs, SIMAR y tur Directiva di Scol ta haya e concept pa duna feedback y input;
- Finalmente e proposicion ta bay pa Minister di Enseñansa di Aruba pa aprobacion.
E ATV-dagen pa “Ambtenaren en Gelijkgestelden” ta keda stipula pa Departamento Recurso Humano (DRH). E proposicion ta bay Ministerraad pa aprobacion. Na momento cu ricibi e aprobacion e fechanan ta keda publica riba nos website [ea.aw].
E prome dia di scol pa aña escolar 2023-2024 ta diahuebs dia 17 di augustus 2023.
E prome dia di scol pa aña escolar 2024-2025 ta dialuna dia 19 di augustus 2024.
E ley di enseñansa obligatorio ta na vigor na Aruba. Cu esaki pais Aruba a tuma e obligacion pa garantisa y realisa e derechonan di cada mucha cu ta cay bou di e ley aki. Tur mucha for di 4 aña te cu 16 aña cu ta biba na Aruba ta suheto di e ley di enseñansa obligatorio.
Ley di Enseñansa Obligatorio ta mantene su mes na e dianan di vakantie di scol aproba pa Minister di Enseñansa di Aruba. Si un alumno cu ta cay bou di enseñansa obligatorio falta scol sin permiso prome of despues di un vakantie nos ta yama un absentismo di luho. Tin circunstancia na unda e alumno por haya dispensacion. E mayornan/cuidadonan por entrega un peticion por escrito solamente cerca e director di scol.
Mas informacion:
