Certificacion (waarmerken) di un diploma ta nifica cu un instancia ta declara (of certifica) cu e contenido di e copia ta coresponde cu e diploma original y cu esaki ta pertenece na e sistema di enseñansa (legalmente) reglamenta di e pais.

Normalmente e instituto educacional na unda a obtene e diploma ta certifica e validez di e diploma. Pa e motibo aki ta consehabel pa tuma contacto cu e instituto na unda a obtene e diploma.

Dienst Inspectie van het Onderwijs (DIO) ta certifica (waarmerk) diploma(nan) obteni na Aruba y cu ta pertenece na e sistema di enseñansa legalmente reglamenta na Aruba. Tambe por pasa na e scol aki na Aruba, unda a obtene e diploma. E scol cu a otorga e diploma, por waarmerk e diploma.

Actualmente (2026) e dia y orario cu por certifica (waarmerk) diploma na DIO ta:

Di dialuna 6 di juli te cu diabierna 17 di juli:

• entre 9 or di mainta cu 12 or di merdia.
• entre 2 or di merdia cu 4 or atardi.

Di dialuna 20 di juli te cu diabierna 14 di augustus:

• entre 2 or di merdia cu 4 or di atardi.

Entrante 17 di augustus:

• tur diamars y diabierna di 2 or di merdia pa 4 or di atardi.

Acudi na Dienst Inspectie van het Onderwijs ubica na John F. Kennedy Education Center na Stadionweg 37 den Sala JFK (wak riba mapa).

• Bo mes mester haci copia di bo diploma y copia di bo cijferlijst.
• Pa evita bruhamento entre e documentonan original y e copianan, ta recomenda pa saca copia di diploma y cijferlijst riba papel A4 normal den preto-blanco. Dus no saca copia na color riba cartolina.
• Bo mester trece e originalnan cu bo pa e copianan por wordo certifica.
• Dienst Inspectie van het Onderwijs ta certifica (waarmerk) solamente diploma y cijferlijst oficial. Ningun certificado di curso ta wordo certifica.
• E copia mester ta identico na e original (si e diploma ta om en om, e copia tambe mester ta om en om) pero den preto cu blanco (si e scol a stempel riba e copia bo mester haci copia di nobo paso e mester ta identico cu e original).
• EPI unit Economie mester tin tur 4 cijferlijst: original y copia.
• Pa diplomanan internacional p.e. di USA, Canada, Costa Rica, Colombia, etc. Dienst Inspectie van het Onderwijs lo investiga si e estudio concerni tin acreditacion cu ta worde acepta na Aruba. Den caso cu e estudio no tin un acreditacion, lo mester acudi na un notaris.

Por fabor tene na cuenta cu Dienst Inspectie no ta saca copia.

E cantidad di copia cu por wordo certifica ta 3.

Awendia mayoria scol ta pidi pa upload documento digital, pues ta consehabel pa scan e copianan certifica (gewaarmerkte kopieën) pa tin nan digital.