Natuur en Milieu Educatie


Den su vision como Minister di Enseñansa, dr. Armando R. Lampe, a bin cu e idea pa introduci Natuur- en Milieu Educatie (NME) den e curiculo di e scolnan primario di Aruba pa aña escolar 2020-2021.

Meta

E meta di NME  ta pa trece e alumnonan mas cerca di naturalesa cu un acercamento mas pragmatico y practico. E curiculo Arubano ja conoce e materia Conocemento di Naturalesa (Kennis der Natuur) y tambe e materia integral Orientacion Mundial (Wereldoriëntatie) cu tambe ta nombra y trata componentenan di naturalesa. E oferta di NME ta un complementacion di esaki. NME ta stimula e alumnonan pa pensa bon tocante naturalesa, hygiene, nan ambiente di bida, Aruba su flora y fauna, y mas cu tur pa duna nan na edad hoben e pensamento corecto y manera di actua relaciona cu estilo di bida saludabel y cuido di naturalesa y e medioambiente. Minister a instrui drs. Samuel Dumfries, di Departamento di Enseñansa Aruba (DEA), pa desaroya un programa hunto cu e specialistanan di Fundacion Parke Nacional Arikok (FPNA) cu lo wordo aplica como piloto durante aña escolar 2019/2020 na cuatro diferente scol den e tres prome capanan anual di educacion primario.

Conscientisa

Ta importante pa nos ta consciente di e naturalesa rond di nos y pa nos realisa cu naturalesa y nos medio ambiente mester bay man den man cu ken nos ta como ser humano. Nos manera di anda cu naturalesa ta depende di kico nos haya durante nos carera escolar y alabes loke nos ta siña di naturalesa durante nos criansa na cas. Como ser humano, nos por siña y pensa tocante naturalesa y medio ambiente y con pa trata cu esaki den futuro. Nos ta biba den un mundo habri cu perspectivanan  cambiabel di cua nos por tuma decision nan. Ademas di aumenta complehidad y polifasismo den situacion di escogencia, e efectonan di nos escogencia tambe a bira mas compleho y extenso.

Stimula

NME ta stimula e alumnonan pa pensa y actua di un forma critico, creativo y dirigi riba solucion, y esaki ta duna ampliacion y profundisacion na e curiculo nacional. NME lo ta disponibel desde scol preparatorio y asina e conscientisacion di nos naturalesa ta wordo stimula y duna desde un edad hoben durante e carera escolar.

Tema

E oferta NME di e proyecto piloto ta cubri tres tema: Residuo, estilo de bida saludabel y flora y fauna. Afval, Gezonde Levensstijl en Flora & Fauna. E tema nan aki lo wordo introduci den fase nan na e maestronan di e scolnan piloto pa un introduccion gradual y un implementacion cla. Despues di aplica e material piloto, un evaluacion lo tuma luga hunto cu e scolnan y e maestronan participante cu e fin di garantisa un oferta amplia y solido di NME cu henter Aruba lo por uza den futuro.


Nieuws


Info / Contact

Scroll To Top
  • © 2011-2020 Department of Education Aruba (DEA)
  • T +297-528-3400
  • F +297-528-3434
  • info@ea.aw