Metodo “Taalpret”

February 1, 2018

Seccion Desaroyo di Curiculo di Departamento di Enseñansa Aruba (DEA) ta informa cu hopi satisfaccion cu a publica e metodo “Taalpret”, un metodo di Hulandes como idioma stranhero pa scol preparatorio.


Taalpret ta un metodo pa e materia Hulandes y ta basa riba didactica di “Total Physical Repsonse” (TPR) cu ta un forma di enseñansa di idioma stranhero cu acercamento orienta riba accion. E metodo ta brinda actividad cu tin sentido pa e mucha pa asina e siña e idioma aunke cu apenas e ta domina Hulandes.

Un meta importante di e metodo ta pa e mucha siña Hulandes den un forma placentero. Ta stimula e mucha anda cu e idioma stranhero como medio di comunicacion den un situacion real di scol.

E metodo ta consisti di diferente manual pa e maestro, buki di potret, baki di carchi, wega di mesa di bestia y diferente ilustracion pa sostene e lesnan.

Taalpret ta pone hopi enfasis riba ampliacion di vocabulario. Na final di e prome aña di scol preparatorio e mucha por compronde 800 palabra na Hulandes y na final di e di dos aña ta duplica e cantidad aki. E temanan di Taalpret ta topiconan actual pero ta trata tambe topiconan cu ta mas leu di e mucha su mundo.

A desaroya e metodo inicialmente den cuadro di e Proyecto Scol Multilingual y a inicia cu implementacion di e metodo prome na e scolnan piloto, cualnan ta Conrado Coronel y Trupial. Banda di e dos scolnan aki tabata tin hopi interes di parti di mas scol pa implementa e material den nan scolnan. E seccion Desaroyo di Curiculo di nos departamento a sostene e otro scolnan aki den implementacion di “Taalpret”, den su version provisorio. Den e aña escolar anterior a publica e material cu entre tanto a keda entrega na tur scol preparatorio.

Realisacion di e metodo tabata posibel danki na un ekipo di desaroyador di e seccion Desaroyo di Curiculo den cooperacion estrecho cu experto di Hulanda, sr. Frans Teunissen kende a specialisa su mes den desaroyo di idioma stranhero cu amplio experiencia den e tereno.

Den e aña escolar actual Centro pa Desaroyo Continuo (CDPC) di Instituto Pedagogico Arubano ta ofrece guia na algun scol preparatorio con pa anda cu e metodo, haciendo uzo di didactica nobo dirigi riba idioma stranhero (vreemdetaal didactiek). Tur otro scol preparatorio cu ta interesa den e guia di “vreemdetaal didactiek” por acudi na CDPC di Instituto Pedagogico Arubano.

Un palabra di gradicimento ta bay naturalmente tambe na tur scol cu a mustra interes for di inicio den e material aki y pa e bon cooperacion ricibi den e fase di implementacion y “try out” di e material. E metodo Taalpret ta un trabou pionero den mundo ya cu na ningun parti di mundo a desaroya material di Hulandes como idioma stranhero pa mucha jong. E material a capta hopi interes tambe di e islanan Corsou, Boneiro y Saba.

Palabra di gradicimento ta bay tambe na FDA cu a haci publicacion di e metodo posibel.

Ta e deseo pa e metodo “Taalpret” contribui efectivamente na enseñansa di idioma Hulandes cerca nos muchanan di scol preparatorio den un forma placentero.

 


Info / Contact

Pa mas informacion por busca [C] Curriculum ontwikkeling den e alfabet menu riba homepage of por tuma contacto cu DEA | Curriculum ontwikkeling. Tambe por sigui e desaroyonan a traves di facebook page @educationaruba.

Scroll To Top
  • © 2011-2018 Department of Education Aruba (DEA)
  • T +297-528-3400
  • F +297-528-3434
  • info@ea.aw