Malala un inspiracion pa hoben y adulto

November 9, 2016

Ministerio di Enseñansa a incorpora e documentario di e bida y experiencia di Malala como un di e aspectonan inspirativo den e programa di Luna di Enseñansa.

E evento special a inclui e pelicula tocante di e bida di e hoben Pakistani, kende mester a lucha y a sobrevivi atentado contra su bida pa e logra e derecho di enseñansa. E di dos parti di e evento a consisti di e oportunidad pa esunnan presente den publico intercambia di idea y opinion cu un panel.

E hoben Pakistani Malala a bira conoci rond mundo ora cu el a dicidi di para fuerte y bringa pa su derecho di haya un educacion formal. Su storia a inspira miyones di persona hoben y adulto na tur continente.

Malala a risca su bida pa mantene su derecho pa haya un educacion den un pais unda cu casi ningun mucha muhe no tabatin mag di bay scol, el a inspira mundo y pone enfasis riba e importancia di enseñansa. El a inspira tambe hopi hende cu ainda ta luchando pa e derecho aki. E presentacion a conta cu interes di hopi educado, mayor y studiante, y e intercambio cu a sigui despues di e pelicula a cubri hopi topico, y a inclui e perspectiva di Aruba den e discusionnan.

Tabata bunita pa wak entre e hobennan presente un mucha muhe cu a inspira masha hopi hende na Aruba cu su video riba Facebook, unda cu el a splica con el a ataca diferente fase den su trayectorio pa logra e nivel di enseñansa cu e ta desea. E video di Chantell Martha ta disponibel riba su pagina di Facebook pa tur esunnan cu lo kier wak e y mustr’e na nan yiunan y otro hobennan. Chantell actualmente tin 20 aña y ta un alumno di Avond MAVO, San Nicolas.

Su conseho na tur hoben ta pa no rindi, sigui tras di nan soñonan y pusha nan limitenan. El a agrega cu e ta un prueba bibo cu cualkier persona por logra y vence. Hustamente locual cu Chantell su palabranan a reflecciona, ta loke e cabesante di Instituto Pedagogico Arubano (IPA), esta Marilyn Richardson a bisa cu ta e palabra cu ta describi e esencia di e presentacion, esta “Believe” (kere).

Segun Richardson ta splica e pelicula a refleha e importancia pa un persona kere den su mes, den causanan y den enseñansa. El a observa tambe cu educacion ta un beneficio fuerte, y cu na Aruba ta parce cu hendenan no ta realisa cu nos tin algo disponibel pa tur persona cu na algun otro pais mester bringa hopi duro pa logra tin’e.

Richardson a bisa cu e presentacion ta uno cu e lo kier expande riba dje na IPA; e ta un actividad cu a cuminsa como algo pa publico, pero ta algo cu sigur por sigui traha cun’e den gruponan mas chikito.

Den e entrevista despues di e presentacion a puntra e cabesante di IPA tambe encuanto di e “pasion pa enseñansa” di parti di su alumnonan, y el a splica cu esaki ta hopi dificil pa midi prome cu nan drenta e opleiding. E prome aña, esta e propaedeuse ta un aña di orientacion general tambe, unda cu e studiante su pasion pa e profesion lo resalta den su esfuersonan.

Den e prome aña ta sali si e studiante tin e aspectonan importante pa por sigui. Den caso di e studiante hoben cu a caba di sali for di scol secundario lo nota den e proceso di formacion si e di berdad tin e pasion pa e carera, sinembargo cerca e studiante cu un edad un poco mas halto ta resalta mas tempran si ta e estudio aki ta loke e kier di berdad. E pasion ta algo cu durante di e proceso di formacion por nace tambe, el a agrega.

Richardson a conclui bisando cu e evento ta uno cu bal e pena pa ripiti y comparti den IPA sigur; e lo yuda habri wowo di e hobennan pa aspectonan importante y e importancia di enseñansa en general.

Minister Michelle Hooyboer-Winklaar na su turno a splica cu a bin dilanti por ehempel e punto cu e derecho pa haya un diploma ta kisas un derecho cu ta wordo tuma “for granted” na Aruba, y a papia di obstaculonan cu mucha muhenan ta topa cun’e y con pa guia e muchanan en general, muhe y homber, pa pasa over di e bareranan cu nan ta topa cun’e. E mandatario a agrega cu de facto tin barera cu kisas nunca lo kita completamente y a papia tocante di diferente formanan cu por stimula mucha muhenan pa studia, pero tambe con pa percura pa e mucha hombernan no keda atras.

Algun di e temanan cu a bin dilanti ta inclui sexualidad, famianan kibra y problemanan socio-emocional, y a discuti tambe e posibel solucionnan pa e retonan existente.

Minister Michelle Hooyboer-Winklaar a remarca cu tabata un anochi fantastico y lo ta encurashando scolnan pa trece e storia di Malala dilanti y uz’e como un oportunidad pa un combersacion inspirativo y diferente na e scolnan.

Loke ta busca cu Luna di Enseñansa ta entre otro pa eleva enseñansa, pa conscientisa mas persona posibel riba e importancia di enseñansa y kico tur e aspectonan ta cu mester tene cuenta cun’e. E programa ta sirbi como un plataforma pa trece e hendenan trahando den “veld” hunto pa intercambia di idea, pa combersa, pa inspira otro y discuti e retonan comun cu nan ta luchando cun’e. Ta traha pa stimula intercambio y beneficia di e participacion di tur nivel di enseñansa, for di e directivanan di scol y docentenan, te na esunnan envolvi cu Ministerio di Enseñansa.

Un di e elementonan positivo di e celebracion ta cu ta probecha di haya un idea, sondea y papia tocante kico mester cambia y con ta yega na logra e cambionan necesario.

Ministerio di Enseñansa t’ey pa yuda kita obstaculo, cambia maneho cu no ta cuadra y leynan cu mester cambia. Tin limitacionnan of cosnan cu ta wordo percibi como limitacion, cual por wordo surpasa. Un di e cosnan cu ta sigui sali for di intercambio, discusionnan y sondeo, ta cu loke ta mas dificil pa cambia ta e sierto percepcion di loke ta stroba nos y kiko nos por haci erover, segun Minister Hooyboer-Winklaar ta splica, pero esey mes tambe tin forma pa traha cu y rond di e obstaculo aki y toch logra yega leu.

E la conclui bisando: “bes tras di bes ta keda comproba cu hendenan cu inspiracion pa haci cierto cosnan ta yega leu.”

 


Info | Contact

Pa mas informacion por busca den e alfabet menu riba homepage: [L] Luna di Enseñansa of por tuma contacto cu: Ministerio di Enseñansa

Scroll To Top
  • © 2011-2019 Department of Education Aruba (DEA)
  • T +297-528-3400
  • F +297-528-3434
  • info@ea.aw