Traimerdia Washington ta haci uzo di Disciplina Consciente
Di un forma original na unda a trece parti di e cultura di Aruba pa dilanti, enfatisando e bunitesa di nos bailenan y combina esaki cu un Dande, e docentenan, boluntarionan y tur muchanan cu ta participa den e programa “Traimerdia” na Scol Basico Washington na Noord a yama Bon Bini na aña 2015, den presencia di Minister di Enseñansa.
“Mi no kier boso yama mi Minister sino Tanchi Michelle”, asina Minister Michelle Hooyboer–Winklaar emociona a dirigi su mes na e muchanan, mientras e tabata presencia e bailenan y canticanan cu e muchanan a prepara special pa e ocasion aki.
“Mi ta brinda awe cu boso pa trankilidad, pa boso por siña hopi y gosa di tur e bukinan bunita cu boso por lesa for di dje” Minister Michelle Hooyboer-Winklaar ta dirigi su mes na e muchanan mientras cu den su man e ta tene un paki di juice y simbolicamente tur mucha ta brinda hunto cune.
Siguiendo e disciplina di Conscious Discipline, docente Vanessa Zarra ta elabora riba e exito di e programa na Scol Washington na Noord. “Pa nos ta hopi importante pa uni hopi bon cu e mayornan y sigui e filosofia di Disciplina Consciente ya cu e ta yuda hopi” Juf. Zarra ta sigui conta.
Conscious Discipline ta haci uzo di un programa entre otro pa descubri secretonan pa completa inteligencia emocional y ta uza e sistema di maneha un klas na unda conflicto ta wordo soluciona den cooperacion. E ta un programa cu ta yuda e chikitinnan percibi, uza, comprende y maneha nan emocionnan.
“Mi ta contento na Traimerdia, e ta laga mi siña cu hopi tekening y tambe mi por comprende hopi mas di tur loke ta wordo bisa dor di esaki y asina mi ta siña stima mi ruman y yude hopi mes”, asina Guizza un alumno di Traimerdia a finalisa bisando mientras e ta yuda kita tur e materialnan uza pa e bishita importante aki.
Info / Contact
Pa mas informacion por busca den e alfabet menu riba nos homepage:
Por tuma contacto cu:
Scroll To Top
