Luna di Enseñansa 2016
Celebracion di “Luna di Enseñansa“ ta cuminsa cu nominacionnan pa Appel di Oro, Premio Nacional di Excelencia den Enseñansa na Aruba, asina Minister di Enseñansa Michelle Hooyboer-Winklaar a anuncia recientemente durante un Conferencia di Prensa.
 |
Minister Hooyboer-Winklaar a splica cu un biaha mas lo duna reconocimento na esfuersonan excelente den seis categoria, cual ta Proyecto Escolar, Maestro, Dirigente, Actor di Sosten, Newcomer of the Year y Lifetime Achievement.
“Kende cu ta haya cu nan conoce un persona trahando den enseñansa cu pa un of otro motibo ta merece un reconocimento pa nan esfuersonan excelente por yena e formulario pa nomina e persona“. E minister ta invita comunidad henter pa acudi na e website y yena e Formulario di Nominacion pa Appel di Oro no mas tarda cu dia 19 di september. |
Na 2015, a ricibi mas di 60 nominado y ta spera cu e aña aki lo surpasa 100 nominado como cu e oportunidad pa registra un nominacion online ta facilita mas participacion. E premio nacional a haya un acogida grandi aña pasa, y ta spera ainda mas entusiasmo rond di e proceso e biaha aki.
Programa Luna di Enseñansa
Luna di october lo ta completamente dedica na Enseñansa.
E Premio Nacional di Excelencia den Enseñansa ta un di e elementonan cu ta duna realce na e celebracion di Luna di Enseñansa.
Ademas di e premiacion Appel di Oro lo tin varios otro actividad y evento cu lo keda anuncia durante luna di september.
E Luna di Enseñansa lo clausura riba dia 28 di october cu un evento special cu entrega di Appel di Oro den e diferente categorianan.
Minister Hooyboer-Winklaar ta entusiasma cu e programa special pa Luna di Enseñansa, e preparacionnan ta den un fase avansa caba, y e mandatario lo anuncia e diferente actividadnan den e proximo simannan.
 |
Pa cualkier pregunta relaciona cu e proyecto Appel di Oro por tuma contacto cu sra. Sharine Croes na telefon 528-3415 of via email appeldioro@ea.aw.
Info | Contact
Pa mas informacion por busca den e alfabet menu riba homepage: [A] Appel di Oro of por tuma contacto cu: Departamento di Enseñansa Aruba | Ministerio di Enseñansa
Scroll To Top