Cristal den un bachi nobo. Metodo di Papiamento pa scol secundario.
Un proyecto di renobacion di e metodo, cu a cuminsa tres aña pasa, awor ta mira luz di dia.
Despues di un espera di mas cu 20 aña, cu orguyo Departamento di Enseñansa Aruba ta presenta metodo di Papiamento pa scol secundario, esta Cristal, den un bachi nobo.
E hobennan y docentenan di e scolnan secundario, esta EPB, MAVO y HAVO lo topa cu e formanan didacto nobo, cu ta inclui e habilidadnan di siglo 21, opcion pa haci tarea online y temanan contemporaneo.
Ta conoci cu enseñansa di idioma materno ta primordial pa e desaroyo di un studiante y pais. Pensa, papia, skirbi, discuti, delibera y expresa den bo idioma materno y desaroya esaki riba nivel cognitivo y academico ta un derecho fundamental pa tur ser humano, cu ta contribui na adkisicion di otro idioma y siñamento mas facil. Cu presentacion di Cristal den un bachi nobo, Aruba kier duna su yiunan di tera e mesun oportunidadnan cu tur otro studiante tin na nan pais, esta siña nan mesun idioma na scol.
Departamento di Enseñansa Aruba ta masha contento cu e producto aki, cu ta prome den e serie di cinco tomo. Produccion di tomo dos di Cristal ya ta den tapara y pronto lo yega pa sustitui e version anterior.
Departamento di Enseñansa Aruba ta desea e scolnan hopi exito cu Cristal 1 den un bachi nobo!
Info / Contact
Pa mas informacion por busca tambe den e alfabet menu riba nos pagina principal:
- [A] AVO 3.0
- [P] PEN2030