Conferencia di prensa: Retonan den Enseñansa
Durante e conferencia di prensa di Gobierno di Aruba dia 27 di september 2021, e minister encarga cu enseñansa (Croes), a elabora riba e prome dianan di trabou y e retonan pendiente den enseñansa.
Durante e prome dianan di trabou, Minister Croes a reuni cu diferente stakeholder, entre otro Departamento di Enseñansa Aruba, Dienst Inspectie van het Onderwijs, Universidad di Aruba, Colegio EPI y sindicato SIMAR. Durante e reunionnan un cantidad di reto y problemanan pa resolve a bin dilanti cu sigur lo haya oido den e maneho di Minister Croes.
“Como minister di Gabinete Wever-Croes 2, mi lo percura pa scucha tur stakeholder, analisa e dolornan y saca e punto di prioridad den e field aki. Mi ta kere cu si tin e boluntad di tur partido y nos tur kier e mesun meta, nos lo por logra esaki pa e causa comun,” e minister a bisa.
Landamento escolar
Minister Croes a tuma contacto cu Departamento di Recurso Humano (DRH) pa haya e conseho final di DRH pa despues sinta bek cu e sindicatonan y/of e representantenan pa haci proposicionnan pa trata di tur manera pa regla e proximo pago di e instructornan di Landamento escolar.
SKOA
Pa locual ta e reto relaciona cu e werksters di SKOA, Minister Croes a indica di lo reuni cu SKOA e siman aki pa scucha nan banda. E minister ta propone pa forma un comision y den 30 dia bin cu un solucion structural. Minister Croes ta kere cu un comision di 5 persona cu representacion di SKOA, di ministerio (expertonan huridico/financiero), di finansas y experto externo, lo por yuda resolve e problematica aki. Lo pidi nan pa den 30 dia repasa e leynan, vonnis y Ministerraadbesluiten pa bin cu conclusion y un conseho final pa asina na un manera elegante yega na proposicionnan sostenibel cu ta atende cu e poblema aki.
OAA
Pronto lo cuminsa cu un comision pa atende cu e retonan relaciona cu Openbare Avondleergangen Aruba (OAA). E minister ta indica cu ya ta wardando algun conseho pa asina pronto yama e grupo aki aden pa tuma algun decision pa structuralmente por resolve esaki.
EPB
Un otro reto cu recientemente a presenta ta cu tin un grupo di 35 alumno cu no por a cuminsa scol na EPB pa motibo cu no tin fondo disponibel pa extra klas y maestro. E titular encarga cu enseñansa a indica cu ya caba a pidi begrotingscoordinator pa sondea den e presupuesto cu e minister saliente a laga atras. A scucha cu e posibilidadnan tey y ta spera cu e siman aki lo por yega na un acuerdo cu e stichting pa pone e fondonan aki disponibel, pa asina por habri e klasnan pa e muchanan bay scol. E ley ta riba mesa y mester percura pa e recursonan.
HOH y Colegio EPI
Un otro reto cu a presenta recientementemente ta e echo cu hospital a kirba e “samenwerkingsprotocol” cu Colegio EPI. Mesora e minister a busca informacion pa e ta na altura di e problematica y a papia cu e minister encarga cu Salubridad (Oduber) pa pronto por sinta hunto y busca un solucion pa esaki.
Infrastructura
E fondonan pa mantencion di edificionan (di scol) ta keda un reto. Tin listanan di prioridad di diferente scol y cual lo tin atencion pa asina cu cuminsa cu e trayecto pa presupuesto 2022. E ora ey lo percura pa hinca ideanan y fondonan necesario.
“Obhetivo y vision di Gabinete Wever-Croes 2 ta pa soluciona problema. Kisas no ta tur por soluciona mes rapido, pero sigur mi deseo y empeño ta pa soluciona mas tanto posibel y di e manera ey crea espacio pa e trankilidad y paz cu ta buscando pa por goberna miho pa henter comunidad.” e minister a indica.
Info / Contact
Pa mas informacion:
Pa informacion di contacto:
Scroll To Top
