Prome encuentro entre e Minister encarga cu enseñansa y stakeholders
Despues di su huramentacion diamars 21 di september 2021, e minister encarga cu enseñansa, sr. Endy Croes, a cuminsa reuni cu diferente stakeholders.
Departamento di Enseñansa Aruba
Diahuebs 23 di september 2021, Minister Croes a reuni cu director di Departamento di Enseñansa Aruba (DEA) sra. Anna Maria Proveyer y hefe di e seccion encarga cu maneho sra. Sheila Maduro. Minister Croes a skucha cu hopi antencion tur e puntonan cu a keda treci dilanti y principalmente kico ta e prioridadnan pa cu Enseñansa. E minister a indica cu e tabata un bon reunion y cu ta cla pa traha pa trece trankilidad y progreso riba e tereno di Enseñansa.
Dienst Inspectie van het Onderwijs
Diahuebs atardi na Bestuurskantoor Minister Croes a reuni cu sr. John Hessen, Inspector General, y sra. Anoutcka Koolman- Burleson di Dienst Inspectie van het Onderwijs. A delibera riba varios punto di interes y importante pa nos enseñansa.
Tabata un bon reunion y manera e minister a priminti, ta scucha, analisa y bin cu un maneho pa reestablece trankilidad y paz bek den enseñansa. Pa logra esaki lo traha cu portanan habri pa scucha tur “stakeholders”. Hunto nos por.
Universidad di Aruba
Diaranson 22 di september 2021, Minister Croes a ricibi Rector di Universidad di Aruba, dr. Viola Heutger y Presidente suplente di e Colegio di Supervision di e instituto, drs. Angelo Brete pa dialoga riba algun prioridad di e instituto y di e ministerio di enseñansa.
Sr. Brete a introduci e rector nobo di Universidad y a duna un splicacion breve di e structura di e instituto y e rol cu e Minister di Enseñansa tin den esaki, cual ta regla den e Ordenansa di Univerisdad di Aruba (LUA). Dr. Heutger a duna Minister Croes un splicacion amplio di varios proyecto y logronan di Universidad di Aruba. A elabora riba e actividadnan mas nobo di e facultad cu ta wordo financia cu fondonan di Union Europeo, e programa cu ta hiba e nomber Sisstem.
Minister Croes tabata contento di tende cu den e cuadro aki tin varios miembro di e staf academico di Universidad ta trahando pa obtene nan doctorado (Phd). Rector di Universidad a agrega cu tur programa cu e instituto ta ofrece ta acredita y cu tin hopi interes pa Universidad ofrece mas programa riba nivel di ‘Master’.
Rector dr. Heutger a entrega dos reporte anual (2019 y 2020) di Universidad di Aruba cu ta contene informacion financiero di e instituto y tambe estadistica di e cantidad di studiantenan cu ta studia y a gradua na e 4 facultadnan. E Rector a expresa su boluntad pa duna Gobierno di Aruba conseho ora ta necesario riba conceptonan di ley, como tambe riba cuestionnan di maneho di por ehempel idioma y bienestar di nos hobenan.
EPI
Reunionnan riba tereno di enseñansa a continua diabierna dia 24 di september 2021 unda Minister Croes a reuni cu sr. Ryan Maduro, Director General di Colegio EPI y sra. Claudia Whitfiels, Directeur Onderwijs di Colegio EPI. E minister a scucha cu atencion tur e puntonan y prioridadnan cu a keda treci dilanti. Sr. Maduro a expresa di ta contento con e reunion a bay. E minister a priminti di scucha, analisa y bin cu un maneho pa reestablece trankilidad y paz bek den enseñansa y pa logra esaki lo traha cu portanan habri pa scucha tur “stakeholders” pa e bienestar general.
Dienst Publieke Scholen (DPS)
Dialuna 27 di september 2021, Minister Croes a reuni cu sra. Sharuska Dabian, miembro di ekipo di maneho di Dienst Publieke Scholen (DPS). E minister a scucha cu atencion tur e puntonan cu a keda treci dilanti pa DPS y e prioridadnan pa cu e tereno di enseñansa.
SIMAR
Diamars 21 di september 2021, Minister Croes den su prome salida, a reuni cu sra. Josephine Albertus y sra. Tricia Ramou-Everon di Sindicato SIMAR. A reuni riba varios punto di atencion y prioridad. “E reunion a bay den bon ambiente y tin tur nos atencion, pa trece trankilidad y progreso den Enseñansa” tawata palabranan di e mandatario.
Info / Contact
Pa mas informacion:
Pa informacion di contacto:
Scroll To Top
