Seccion Studiefaciliteiten di Departamento di Enseñansa ta informa cu a extende e fecha pa aplica pa un Arubalening te cu 30 di april 2022, pa tur esnan cu ta desea di sigui cu nan estudio na Augustus 2022.
Esaki ta encera cu ainda por registra pa un Arubalening account. Despues di e fecha aki (30 di april 2022) por haci aplicacion pa un Arubalening entrante Januari 2023.
Na momento cu ta bay registra pa un Arubalening Account bo mester di un prueba di nacionalidad Hulandes (copia di paspoort) y un email adres valido.
1 - Prueba di nacionalidad Hulandes
Pa registra pa un Arubalening Account mester bay na e pagina [A] Arubalening Portal riba nos website ea.aw y click riba “Registra pa un Arubalening Account aki”. Aki bo ta yena e formulario “Aanmelding voor een Arubalening Account” y como bijlage ta upload:
[1] bo prueba di nacionalidad Hulandes (copia di paspoort).
Den e formulario ta importante pa yena un email adres valido. E email adres aki ta bira bo username pa log in den e Arubalening Portal y lo haci uzo di dje pa comunica cu bo. Ta sugeri pa haci uzo di un hotmail account, mirando cu e sistema no tur ora ta tuma gmail accounts.
Despues cu bo a registra bo lo mester ricibi un email (dentro di 3 dia di trabou) cu ta indica cu bo Arubalening Account a keda aproba y cu bo por log in den e Arubalening Portal pa sigui cu e proceso di aplicacion, cu ta encera entrega di prueba/documentonan [2] te cu [4].
Problema pa registra? Bo no a ricibi nos email? Bo tin un gmail account?
Den caso cu despues di tres dia di trabou bo no a ricibi un email, bo mester tuma contacto cu Studiefaciliteiten via email arubalening@ea.aw of whatsapp 594-4140.
Bo ta confronta algun problema cu e registracion y/of bo tin un gmail account? Lesa aki kico pa haci
Procedura di aplicacion y aprobacion
ATENCION: Pa por bin na remarca pa un Arubalening entrante Augustus 2022:
- mester registra y entrega e documentonan [1 te cu 4] prome cu dia 25 di april 2022 y
- e ultimo dia pa yena e formulario digital di aplicacion (aanvraagformulier Arubalening) ta dia 30 di april 2022.
Despues cu e registracion pa un Arubalening Account ta aproba bo mester entrega e siguiente documentonan:
2 - Prueba di persoonsnummer
Mester haci e peticion pa un prueba di persoonsnummer na Departamento di Impuesto. Lesa aki con pa haci e peticion pa un persoonsnummer via e website di Departamento di Impuesto.
Log in den e Arubalening Portal y upload:
[2] Prueba di persoonsnummer
3 - Prueba di adres
Mester haci e peticion pa un prueba di adres (Uittreksel Bevolkingsregister) na Censo.
Log in den e Arubalening Portal y upload:
[3] Prueba di adres
4 - Prueba di periodo di inscripcion na Land Aruba
Mester haci e peticion pa un prueba di periodo di inscripcion na Land Aruba (Verklaring van Inschrijving) na Censo.
Log in den e Arubalening Portal y upload:
[4] Prueba di periodo di inscripcion na Land Aruba
Warda aprobacion
Despues cu e documentonan [2, 3 y 4] ta aproba (goedgekeurd) den e Arubalening Portal, bo por sigui cu e formulario di aplicacion (aanvraagformulier) pa un Arubalening.
5 - Formulario digital di aplicacion pa Arubalening
Por haya e formulario digital di aplicacion (Aanvraagformulier Arubalening) den e Arubalening Portal. Log in y riba e “startpagina” (ful abou) yena:
[5] Formulario digital di aplicacion (Aanvraagformulier Arubalening)
Tene cuenta cu e ultimo dia pa yena e formulario digital di aplicacion (aanvraagformulier) pa un Arubalening entrante augustus 2022 ta dia 30 di april 2022.
Formularionan cu drenta despues di dia 30 di april 2022 por bin na remarca pa un Arubalening entrante Januari 2023.
Warda aprobacion
Despues cu e formulario digital di aplicacion [5] ta aproba (goedgekeurd), bo tin te cu 10 di juli 2022 pa entrega e siguiente documentonan:
6 - Copia certifica (gewaarmerkt) di bo vooropleidingsdiploma
Por haya tur informacion tocante certificacion di diploma, manera unda pa laga certifica e diploma y kico pa hiba aki: Certificacion di diploma (waarmerking diploma)
Log in den e Arubalening Portal y upload:
[6] Copia certifica (gewaarmerkt) di bo vooropleidingsdiploma
7 - Informacion di banco (bankgegevens)
Mester entrega prueba di un cuenta coriente di un banco local (na Aruba) na nomber di studiante cu ta aplica pa e Arubalening.
Log in den e Arubalening Portal y upload:
[7] Informacion di banco (bankgegevens)
8 - Prueba oficial di aceptacion na e scol (bewijs toelating)
Log in den e Arubalening Portal y upload:
[8] Prueba oficial di aceptacion na e scol (bewijsstuk toelating)
9 - Prueba di seguro
Log in den e Arubalening Portal y upload:
[9] Prueba di seguro
10 - Informacion di contacto di mayornan (contactgegevens ouders)
Log in den e Arubalening Portal y upload:
[10] Informacion di contacto di mayornan (contactgegevens ouders)
11 - Copia yena y firma di overeenkomst tot geldlening
Por haya e overeenkomsten aki: Arubalening Overeenkomsten
Mester upload un copia yena y firma (cu pen blauw) di e “Overeenkomst tot geldlening” den e Arubalening Portal.
Log in den e Arubalening Portal y upload:
[11] Copia yena y firma di “Overeenkomst tot geldlening”
Warda aprobacion
Despues cu e documentonan [6 te cu 11] ta aproba (goedgekeurd) bo lo haya un “Verklaring tot toekenning” den bo Arubalening Portal. Pa finalisa y formalisa e aplicacion bo lo mester entrega dos (2x) version hardcopy di e “verklaring” aki hunto cu dos (2x) version hardcopy di e “overeenkomst”.
12 - Hardcopy di overeenkomst y verklaring
Entrega na Departamento di Enseñansa Aruba (DEA), seccion di Studiefaciliteiten, ubica na e JFK Education Center na Stadionweg 37 (mapa di compleho):
[12] Dos (2x) version hardcopy di bo “Overeenkomst tot geldlening” plus dos (2x) version hardcopy di bo “Verklaring tot toekenning” firma cu pen blauw
Ta sugeri pa studiantenan acudi regularmente na nos website ea.aw como tambe sigui nos via social media (facebook, twitter, instagram) @educationaruba.
Pa preguntanan relaciona cu Arubalening por manda un email na arubalening@ea.aw of un whatsapp na number 594-4140. Tambe por yama 528 3400 y puntra pa seccion Studiefaciliteiten.
Pa mas informacion relaciona cu Arubalening por busca den e alfabet menu riba nos pagina principal:
