Search Facebook Instagram Twitter

Un famia cu curason pa enseñansa

November 1, 2016

Juffrouw Maria Thiel-Lopez ta un actor conoci y hopi aprecia den ramo di enseñansa. E ta conoci como persona cu a motiva y inspira hopi alumno.

Juffrouw Mani, kende actualmente tin e bunita edad di 80 anja, a pasa su pasion pa enseñansa pa su yiu Wino Lopez, y su subrinanan Mildred Wardlaw-Thiel Dolores Thiel, y nunca a pensa cu e lo wak un dia cu tur tres lo tabata nomina pa e premio di excelencia den enseñansa, esta Appel di Oro.

Recientemente a tuma luga un dia extraordinario pa juffrouw Mani, kende a presencia e momento cu su yiu Wino Lopez a ricibi e Appel di Oro como dirigente di scol EPB San Nicolas; y tabatin e oportunidad unico pa aplaudi su subrina Mildred Wardlaw-Thiel como nominado pa e Appel di Oro pa dirigente di Scol Practico pa Ofishi Santa Cruz, y su otro subrina Dolores Thiel, kende tabata nomina pa e Lifetime Achievement Award.

Meneer Wino Lopez ta trahando 28 aña den enseñansa di cual 21 aña den maneho. Su pasion den su trabou ta refleha indudablemente den e parti cu mas e ta gusta, esta trahamento cu hende. E ta fascina cu e tin e oportunidad unico pa yuda forma e futuro generacionnan di nos isla.

Meneer Wino ta bisa cu p’e e recompensa di su trabao no ta instantaneo, pero ta bin despues, ora cu e mira su alumnonan cu a sobrepasa obstaculonan, haci un bunita esfuerso y ta logra yega leu den bida.

Actualmente meneer Wino a yega na un punto den su carera cu e ta bay topa cu e di tres generacion di alumnonan, esta e nietonan di su prome alumnonan. Como dirigente, e ta haya cu e lider mester haci tur loke ta posibel pa e team di scol briya y yega na e nivelnan mas halto. E dirigente tin cu saca nan potencial, “empower” nan y percura pa e team ta contento.

Meneer Wino ta agrega cu e dirigente ta esun cu mester cende e candela pa nan sigui traha riba e iniciativanan cu wordo tuma, e mester crea e “randvoorwaarden”, ta su responsabilidad pa percura pa tur cos ta na su luga y pa e guia e docentenan, cuida nan y hiba nan na un nivel mas halto. E team di docente ta e factor “constant” y stabiel na scol, y si e team ta funciona bon, e alumnonan ta sigura di ricibi bon educacion, segun meneer Wino ta splica.

Meneer Wino ta conoci como un cabesante cu ta lucha pa su alumnonan haya un bon calidad di enseñansa, y e ta busca tur manera pa yuda e alumnonan riba tereno academico, pero tambe den e area emocional, economico y social.

Masha pabien meneer Wino Lopez cu e Appel di Oro 2016 pa dirigente di scol secundario.

 


Info | Contact

Pa mas informacion por busca den e alfabet menu riba homepage: [A] Appel di Oro of por tuma contacto cu: Departamento di Enseñansa Aruba | Ministerio di Enseñansa

Scroll To Top
  • © 2011-2023 Department of Education Aruba (DEA)
  • T +297-528-3400
  • F +297-528-3434
  • info@ea.aw

By orbitalnets