Tur scol primario a ricibi material di Disciplina Consciente

June 16, 2015

Un desaroyo social-emocional tin influencia positivo riba prestacion academico. Den e cuadro aki alumno y docentenan di Colegio Sta. Teresita a habri siman cu un cantica di ‘Disciplina Consciente’ pa saluda Minister di Enseñansa cu a bishita e scol pa haci entrega di e pakete di material na Cabesante di scol, Janine Soliana-Vingal y director di SKOAJosette Daal.



Klas 1A di juffrouw Kimberly d’Aguiar a mustra Minister Michelle Hooyboer-Winklaar con nan ta haci ehercicio di hala rosea como ‘brain break’. Esaki ta un actividad pa yuda muchanan haya nan enfoke di nobo. E ta dirigi riba suministra oxigeno pa e cerebro. Si e celebro  falta oxigeno, e ta afecta e parti di celebro cu ta dirigi riba siñamento.

Den klas 2B di juffrouw Tayliza Bernabela, Minister por a scucha un storia for un di e bukinan di Disciplina Consciente cu ta siña e mucha cu tur escogencia tin consecuencia.

Den cuadro di proyecto “Zorgprogramma’s ter ondersteuning van kinderen en jeugdigen” – deelproject “Zorgprogramma’s binnen het onderwijs” financia pa Fondo Desaroyo Aruba (FDA) a bestel material pa desaroyo social-emocional di alumnonan di 63 scol di enseñansa primario y sistema di sigui e mucha den su desaroyo (Leerling volgsysteem pa 59 scol). E sistemanan di siguimento di alumno menciona ta digital y scolnan ta ricibiendo esaki via email. Pa loke ta trata e programanan social-emocional, mayoria scol a ricibi esaki caba.



E programa social-emocional cu a resalta den escogencia ta e programa Disciplina Consciente (Conscious Discipline) di “Loving Guidance”. Di e 63 scol un cantidad di 52 scol a scoge pa e programa aki. E escogencia pa e programa social-emocional di Disciplina Consciente ta cuadra cu e programa di gobernacion 2013-2017 den cual ta menciona cu pa mehora calidad di enseñansa lo pone atencion special na e bienestar di maestro y cuido di alumno.

Otro proyecto y desaroyonan cu tambe ta dirigi riba bienestar di maestro y alumno ta: ‘Gezonde school’, ‘Veilige school’ y e Expertise- y Observatiecentrum di Multidisciplinair Centrum (MdC) cu ta pone atencion na e desaroyo social emocional di alumno y “Teacher Care” pa e maestro.


Info / Contact

Pa mas informacion por busca [D] Disciplina Consciente of [C] Conscious Discipline den e alfabet menu riba nos homepage of tuma contacto cu DEA | Seccion Guia (Afdeling Begeleiding)

Scroll To Top
  • © 2011-2019 Department of Education Aruba (DEA)
  • T +297-528-3400
  • F +297-528-3434
  • info@ea.aw