Traspaso oficial di ex JFK-school pa Aruba Investment Bank (AIB)

July 5, 2017

Dia 4 di juli ultimo a tuma luga firmamento oficial di e documentonan cu ta duna luz berde na e proyecto di rescate, restauracion, ampliacion y modernisacion di e edificio conoci como John F. Kennedy School riba L.G. Smith Boulevard.

Manera a keda anuncia, Gabinete Mike Eman a dicidi cu, un bes cla, e edificio aki lo ta destina pa uso di Departamento di Enseñansa y tur su dependencianan. Di e manera aki ta busca pa alcansa tres obhetivo importante:

  1. Rescata un edificio di balor historico pa Aruba;
  2. Reduci e gastonan di huur di edificionan priva y
  3. Crea un mihor coordinacion entre e Departamentonan di Enseñansa treciendo nan hunto.

Prome Minister Eman a declara: Awe riba 4 di juli, Dia di Independencia di Merca, nos ta rescata un edificio nombra na un di e Presidentenan Mericano mas conoci pa su idealnan y pa sirbi henter mundo sin distincion di rasa of religion.”

Construccion lo ta den man di Bohama Aruba N.V. cu ta dispone di un termino di 18 luna of aña y mey pa completa e trabou. Esaki ta nifica cu pa fin di 2018 e edificio lo mester ta completamente cla pa e departamento y personal drenta.

Edificio di John F. Kennedy School ta forma parti importante di historia y educacion tecnico na Aruba,” Prome Minister Eman a indica. Hopi studiante a sigui den ramo tecnico y despues a bira personahe di hopi importancia den mundo industrial y maestronan di e scol tambe ta legendario.”

Premier Eman a gradici Aruba Investment Bank (AIB) como un socio strategico cu a sa di maneha bon e fondo di FDA pa carga e procesonan di renobacion di Aruba hunto cu Gabinete Mike Eman I y II. Awor AIB Vastgoed N.V. kier ta socio cu Gobierno di Aruba den proyectonan pa futuro.

Jessy Simon di AIB a duna di conoce cu nan ta hopi orguyoso di por participa cu Gobierno den un proyecto cu pa hopi aña nan ta wak su importancia. Tambe ta wak cu nan aporte n’e progreso di Aruba ta cuadra den e mision social di e institucion financiero. Nos ta gradici Gobierno di Aruba p’e confiansa. Esaki lo ta djis un di e prome proyectonan pa haci hunto,” Jessy Simon a declara.

Minister di Infrastructura Benny Sevinger a splica cu un di e prome stapnan cu a tuma ora a asumi mando tabata inventarisacion di espacio cu Gobierno tabata huur y e espacio disponibel den propiedadnan di Gobierno. A registra mas di 68 mil meter cuadra na huur, mientras cu tabatin casi mesun tanto bashi. E ora ey a bay over na wak cua por a renoba p’asina baha e huur. Esun cu no por a drecha mas, a pone na benta pa comercio tuma over. Asina nos a renoba un gran cantidad for di San Nicolas te na Oranjestad.”

Proyecto di JFK t’e renobacion di e scol existente y construccion di un edifiico moderno su tras. E ta budget neutral si mira cuanto ta paga pa luna rond Aruba asina e titular di Infrastructura a duna di conoce.

 


Info / Contact

Pa mas informacion por busca [J] John F. Kennedy Education Center den e alfabet menu riba homepage.

Scroll To Top
  • © 2011-2019 Department of Education Aruba (DEA)
  • T +297-528-3400
  • F +297-528-3434
  • info@ea.aw