Search Facebook Instagram Twitter

Study Abroad Information Evening

October 18, 2016

Diamars dia 25 di oktober proximo Ministerio di Enseñansa conhuntamente cu Departamento di Enseñansa lo tene un anochi di informacion pa tur esnan cu tin e interes pa bay studia na Merca of Canada.


Durante di e anochi di informacion lo duna informacion general riba studia na Merca y Canada, lo duna informacion di financiamento di studio (Arubalening) pa por studia na e paisnan aki y tambe lo enfoca riba e estadonan y universidadnan na e paisnan menciona cu cual pais Aruba tin un areglo special pa nos studiantenan Arubiano.

Ta trata aki di entre otro e estado di South Carolina cu ta inclui University of South Carolina (USC) y Coastal Carolina UniversitySeneca College na Toronto Canada, St Mary’s College na Maryland y otronan cu ta den proceso pa wordo formalisa.


University of South Carolina lo ta presente

E anochi aki lo conta cu presencia di sr. Frank McClary, kende ta Director of International Admissions & Recruitment di University of South Carolina cu lo ta na Aruba pa duna informacion na tur studiante cu ta interesa pa studia na e universidad aki.


Skype in cu Studiantenan di Aruba na USC

Despues di e presentacion di sr. McClary nos lo tene in skype in cu 4 studiante Arubiano cu ta actualmente na USC cu lo comparti nan experencia.


Financiamento

Departamento di Enseñansa Seccion Studiefaciliteiten y Aruba Scholarship Foundation tambe lo ta presente pa amplia riba e parti di financiamento di estudio y posibilidadnan di beca di estudio.

Manera a wordo anuncia durante e ultimo añanan Minister di Enseñansa Michelle Hooyboer-Winklaar, na nomber di Gobierno di Aruba, a logra formalisa diferente acuerdo na Merca y Canada cu ta garantisa areglonan special na beneficio di nos studiantenan di Aruba.

E areglonan aki ta encera entre otro “in-state tuition”“out-of-state tuition waver” y tambe descuentonan considerabel riba e suma di gastonan di estudio pa tur studiante Arubiano. E areglonan aki ta un beneficio hopi grandi pa nos studiantenan y ta haci Merca y Canada opcionnan mas accesibel y atractivo pa studiantenan di Aruba.

Tur esnan cu ta interesa pa bay studia na Merca of Canada ta keda cordialmente invita pa e anochi di informacion. Durante di e anochi di informacion lo duna tur e informacion relevante cu studiantenan tin mester pa por bay studia na Merca of Canada y tambe lo tin espacio pa pregunta.

E anochi di informacion lo tuma luga diamars dia 25 di oktober cuminsando pa 7’or di anochi na e Auditorium di Colegio EPI.


Impresion “Study Abroad 2015”


Website cu informacion pa Studia na Merca of Canada

Durante di e anochi di informacion a introduci e paginanan cu a keda publica riba e website Enseñansa Aruba | ea.aw completamente dedica na studiamento na Merca of Canada.

Riba e paginanan aki por haya informacion completo di tur e opcionnan unda cu tin un acuerdo special pa nos studiantenan di Aruba. Ta trata aki entre otro di e estadonan y universidadnan na e paisnan menciona cu cual pais Aruba tin un areglo special pa nos studiantenan Arubiano of unda cu nos studiantenan por bin na remarke pa un areglo special cu ta conta pa studiantenan di Latino America y Caribe.

Riba e pagina por haya tur informacion, documento y links unda cu por haya mas informacion di e acuerdo y areglonan special. Tambe por download e presentacionnan cu a wordo duna durante e anochinan di informacion.


Info / Contact

Pa mas informacion por busca den e alfabet menu riba homepage: [S] Studia na Canada of [S] Studia na Merca of por tuma contacto cu DEA > afdeling Studiefaciliteiten

Scroll To Top
  • © 2011-2023 Department of Education Aruba (DEA)
  • T +297-528-3400
  • F +297-528-3434
  • info@ea.aw

By orbitalnets