Studiantenan di OAA a mustra aprecio na hende muhe

May 22, 2017

Recientemente Openbare Avondleergangen Aruba (OAA) hunto cu Stichting Reclassering en Jeugdbescherming y Ministerio di Enseñansa a lansa e 4 programanan di leerwerktraject, bou di cual un programa completamente nobo cu ta esun di Uiterlijke Verzorging.

Hunto cu partners den e sector di beyesa y cuido, a logra bin cu un programa unda cu studiantenan ta haya cursonan basa riba necesidad di e mercado laboral pa asina cada studiante haya acceso mas facil na un trabou asina cu nan termina e programa. Pa por practica e parti di e teoria di manicure y pedicure riba clientela, a bin cu un proyecto caminda cu nos studiantenan ta duna servicio comunitario.

Pa e proyecto aki a habri un salon di beyesa na SABA caminda cu nos grandinan a haya servicio di cuido di cabey y huña cerca studiantenan. En conexion cu dia di mama OAA, Stichting Reclassering, Ministerio di Enseñansa y Famia a uni forsa cu CEDEHM pa asina hunto honra hende muhenan den comunidad cu un servicio di cuido di huña y makeup. E dia inolvidabel aki a conta cu sosten di sector priva di e.o. Backstage, Medio Cosmetics, Miss 21 Accesories, Manrique Capriles y Make-up Artist Sra. Williams.

Tanto e studiantenan como e clientenan a gosa di un dia den cual studiantenan a practica tur e tecnica nan y conocemento cu nan a acumula desde januari. E studiantenan ta indica cu nan ta hopi entusiasma cu e programa y cu e adelanto cu nan ta mira y biba den e competencianan cu nan ta desaroyando.

E competencianan aki ta forma parti di loke no mucho tempo pasa a anuncia cu e cambionan y reforma cu a tuma luga den e programanan di OAA pa tanto e parti di leerwerktraject como e diferente programanan pe cursonan vocacional di anochi.

Minister di Enseñansa, Michelle Hooyboer-Winklaar a remarca cu: “E cambionan ta bisto no solamente den e programanan vigente, pero tambe den e competencia y conocemento adkiri door di e studiantenan cu na final di e programanan lo haya un transicion mas facil pa sector laboral. Pa logra esaki ta importante pa den un fase inicial tin sosten di partnernan cu ta representa esunnan den comunidad y sector priva cu lo ta e personanan cu lo por ofrece un trabou na e studiantenan despues.”

P’esey ta importante pa tin un acercamento hopi estrecho entre Enseñansa, na momento cu tin programa cu nan sa precies kico ta e necesidadnan di esunnan cu na final di dia lo otorga trabou. E tipo di colaboracion asina entre Enseñansa y sector priva ta algo cu sigur nos tur ta boga pe. Un biaha mas hopi danki, pabien cu un bunita momento unda cu nos ta mira cu e pidanan di e puzzel ta bini hunto” asina Minister Hooyboer-Winklaar a expresa.

 


Info / Contact

Pa mas informacion por busca den e alfabet menu riba homepage: [M] Ministerio di Enseñansa

Scroll To Top
  • © 2011-2019 Department of Education Aruba (DEA)
  • T +297-528-3400
  • F +297-528-3434
  • info@ea.aw