SAM

Scol Arubano Multilingual

Kico ta Scol Arubano Multilingual?

Na inicio di aña 2018 Minister di Enseñansa, dr. Armando Lampe a anuncia cu Aruba lo conoce un cambio den enseñansa; ta trata di implementacion di Scol Multilingual den tur scol preparatorio y basico na Aruba.

SAM ta e nomber oficial di e programa y e curiculo nobo multilingual cu lo keda implementa den scol primario.

> Splicacion di e nomber SAM

Kico ta e beneficionan di Scol Arubano Multilingual?

Scol Multilingual ta un sistema di educacion indispensabel pa Aruba, teniendo cuenta cu e comunidad di Aruba ta multilingual. Multilingualismo ta un rikesa y un oportunidad cu nos comunidad ta brinda cu lo mester tin su refleho tambe den scol. Un idioma ta manera un yabi cu ta habri bo posibilidad pa por comunica y asina desaroya bo mes. Pues mas idioma bo siña, mas yabi bo tin pa por desaroya bo mes den e mundo di awe. Un persona multilingual tin un capacidad mas grandi di compronde loke ta pasa rond di dje, pasobra e por combina su conocemento di mas cu un idioma cu otro.

Cifranan di Censo (2010) ta mustra cu gran mayoria di nos poblacion ta papia Papiamento cu otro na cas (casi 70%), sigui pa 14% di nos poblacion cu ta papia Spaño, 7% cu ta papia Ingles y 6% cu ta papia Hulandes cu otro na cas.

Aunke cu desde aña 2003 Papiamento y Hulandes ta e idiomanan oficial na Aruba, nos por mira cu nos yiunan tin un habilidad tremendo di siña Ingles y Spaño den nan bida diario, sin cu nan a haya les di e idiomanan aki na scol.

Un persona multilingual ta transferi loke el a siña den un idioma pa e otro idiomanan. Esaki ta haci cu un base fuerte den un idioma cu e alumno conoce bon tin su beneficio pa siñamento di otro idioma cu e alumno tin mas dificultad cu ne. Asina por ehempel un bon dominio di Papiamento, cu ta un idioma cu e alumno ta scucha cu mas frecuencia, ta un condicion pa un bon dominio di Hulandes, cu ta un idioma menos conoci pa mayoria di nos muchanan.

Ki tempo Scol Arubano Multilingual lo cuminsa?

Na aña 2018 – 2019 tur klas, cuminsando di scol preparatorio te cu klas 6 di scol primario di e scolnan piloto, lo forma parti di e programa multilingual. Cu e implementacion di Scol Multilingual den tur scol na Aruba e scolnan piloto lo sigi desaroya prome cu e otro scolnan y nan ta un partner (banda di directivanan (schoolbesturen), CDPC di IPA y DEA) den e implementacion di SAM den e otro scolnan preparatorio y basico.

Pregunta y Contesta (FAQ)

Na FAQ SAM (submenu na man robes) por haya e preguntanan mas haci (Frequently Asked Questions) tocante Scol Arubano Multilingual, manera entre otro:

Con ta percura pa nos muchanan por siña Hulandes si casi nan no ta scuch’e pafo di scol?
Con ta para cu e nivel di Hulandes unabes e alumno bay scol secundario?
Con ta bay percura pa tur maestro y docente di e scolnan na Aruba nan nivel di Papiamento ta uno di nivel p’asina nan por duna les?
Kico ta e planifacion pa muchanan cu tin Hulandes como idioma materno?
Con lo planifica e implementacion di SAM?