Restriccion di divisas no ta valido pa studiantenan cu Arubalening
Banco Central di Aruba (CBA) ta informa cu studiantenan cu ta bay studia den exterior cu un Arubalening y cu ricibi e placa pa estudio riba nan cuenta local, por transferi esaki pa nan mesun cuenta bancario den exterior.
Declaracion di Banco Central di Aruba
Banco Central di Aruba a saca un declaracion relaciona cu e restriccion cu tin actualmente pa transferencia di sumanan grandi di placa. Awo cu tin un grupo grandi di studiante cu ta bay studia den exterior, tin excepcion haci pa e grupo di studiante aki. E ta un decision cu Banco Central di Aruba a tuma e siman aki.
CBA ya caba a informa banconan comercial na Aruba cu e restriccion di divisas no ta valido pa studiantenan cu ta bay studia den exterior y cu ta ricibi un “studielening” (Arubalening) di pais Aruba. Esaki ta nifica cu e studiantenan aki cu ricibi e placa pa estudio riba nan cuenta local, por transferi esaki pa nan mesun cuenta bancario den exterior.
Por corda ainda cu a consecuencia di e pandemia COVID-19 dese 17 di maart ultimo a tuma diferente medida pa protege e reserva di divisas. E medidanan aki tin como meta pa garantisa e “koppeling” di Florin na e Dollar. A consecuencia di esaki, no ta permiti pa transferi placa for di bo mesun cuenta na Aruba pa un cuenta di bo den exterior, te proximo aviso.
Fiansa pa estudio otorga door di Pais Aruba, ta wordo deposita riba un cuenta di e studiante di un banco comercial na Aruba. E prestamonan aki tin como intencion pa cubri e gastonan di bida y estudio den exterior. Pues ta necesario cu e studiantenan por transferi e placa aki pa e pais unda nan ta bay studia.
Studiantenan cu ta bay sigui nan estudio den exterior for di e momento ey no ta un habitante na Aruba mas. CBA a informa e banconan comercial na Aruba pa e motibo ey cu studiantenan cu un Fiansa pa Estudio cu ta bay studia den exterior, ta exonera di e restriccion di divisas.
E resto di reglanan introduci dia 17 di maart ultimo den e areglo aki ta keda valido.
Info / Contact
Departamento di Enseñansa Aruba (DEA) afdeling Studiefaciliteiten (Arubalening)
Scroll To Top
