“Nos tur por haci un diferencia”

August 15, 2019

Nos ta na un comienso di un aña escolar nobo. Un momento bunita pa nos tur den e campo di enseñansa para keto y desea otro un aña escolar fructifero.



Cu nos tur mi kiermen: studiante y nan famia, e teamnan di scol, directiva di scol, sindicato, instancianan cu ta sostene Enseñansa, Inspectoria, Ministerio di Enseñansa, Minister y coleganan di Departamento di Enseñansa.

Nos tur por haci un diferencia e aña aki.

Laga nos traha hunto, respetando nos diferencianan di opinion, buscando solucionnan positivo. Cada un haciendo su esfuerso maximo cu e fin di realisa e metanan fiha den nos Plan Educacion Nacional 2030. Nos debe pais Aruba un actitud proactivo y constructivo cu ta aporta na su desaroyo.

Esey ta encera cu nos mester planea hunto, uni forsa y sostene otro y ta critico riba loke nos ta gasta y malgasta. Ban reflexiona riba nos actonan y evalua si nan ta na beneficio di nos pais. Ban papia riba calidad di enseñansa y discuti con nos por mehora esaki. Ban lesa, studia, crea y cambia activamente loke no ta na beneficio di enseñansa.

Departamento di Enseñansa lo enfoca riba 4 meta e aña nos dilanti:

  1. Planea y ehecuta hunto cu tur actor e actividadnan di e Plan Educacion Nacional (PEN 2030);
  2. Crea formanan pa monitoria y informa encuanto e realisacion di PEN 2030;
  3. Restructura y optimalisa e sistema di subsidio di enseñansa, cu e meta pa inverti e.o. den e necesidadnan di e maestro pa nan por duna les optimalmente;
  4. Duna sosten necesario na tur directiva di scol y nan scolnan.

Mi ta desea un y tur un aña positivo y yen di logro!

Anna Maria Proveyer-Groot
Director


Info / Contact

Departamento di Enseñansa Aruba (DEA)

Scroll To Top
  • © 2011-2019 Department of Education Aruba (DEA)
  • T +297-528-3400
  • F +297-528-3434
  • info@ea.aw