Search Facebook Instagram Twitter

Maestro, profesion for di bo curason…!

October 30, 2018

Mayoria biaha nos ta scucha cu un maestro tin dushi bida, hopi dia di vakantie, ta liber desde merdia y asina por menciona mas cos. Sinembargo, no scoge e profesion pa e motibonan robes aki. E profesion di maestro mester sali for di bo curason.

“Educacion ta e paspoort pa futuro, paso mayan ta pertenece na esnan cu ta prepara pe awe.”

Malcolm X


Studiante Michelle Mendes di aña dos di estudio pa maestro di Enseñansa Primario ta comparti su motibo pakico e ta scoge pa bira maestro.

“Amor pa mucha, kier ta parti den formacion y conocemento di un mucha y alabes contribui pa nos enseñansa bay dilanti, ta entre otro e motibonan pakico mi a scoge pa e profesion di maestro.”

“Maestro, un profesion unda cu abo por haci un impacto positivo riba formacion di un ser humano unda cu por saca lo maximo di su potencialidad.”

“Pa por haci esaki posibel bo mester ta un maestro cu ta educa, guia, motiva y inspira.”

“Aki, abo ta e role-model.”


IPA ta invita tur studiante di HAVO, VWO y MBO nivel 4 y tur otro persona interesa pa cuminsa un estudio pa maestro pa asisti na IPA su Dia Publico (Open dag) dia 17 di November 2018 di 10or di mainta te 2or di atardi na IPA (Isaac Wagemakerstraat 11, San Nicolas).

Durante e Dia Publico lo duna informacion di e estudio di Maestro pa Enseñansa Primario, Bachelor Talen y e curso di PDG. Tambe lo duna informacion tocante e Test di admision y 21+ Toets.

Banda di esaki por cera conoci cu e instituto en general y e ambiente estudiantil en particular y conoce nos facilidadnan. Ademas lo tin oportunidad pa combersa cu nos studiantenan actual.

Tambe lo tin un ‘Food & Bake Sale’ organisa pa nos propio studiantenan. E benta di cuminda aki tin como meta pa recauda fondo pa e studiantenan di aña 3 cu pronto lo biaha pa exterior pa nan pasantia internacional. Di e manera aki IPA ta brinda henter Aruba un dia special di orientacion, yen di informacion y actividad.


Inscripcion

Naturalmente lo tin oportunidad pa inscribi como studiante pa e estudio pa Maestro pa Enseñansa Primario, Bachelor Talen y e curso di PDG.

Pa por inscribi na IPA mester trece e papel di registro civil (papel di AWG 5. E gastonan di inscripcion ta AWG 75,-.

Pa inscripcion di e estudio di Maestro pa Enseñansa Primario y Bachelor Talen mester bin cu copia di diploma di sea HAVO, VWO of MBO nivel 4. Pa inscripcion di e curso di PDG mester bin cu copia di diploma di HBO of WO – opleiding.

Pa mas informacion por tuma contacto cu Studenten Services na 5243100 of por bishita nos pagina di facebook ‘Instituto Pedagogico Arubano’ of nos website [ipaaruba.com].


Info / Contact

Pa mas informacion por busca [I] Instituto Pedagogico Arubano (IPA) den e alfabet menu riba homepage of por tuma contacto cu IPA

Scroll To Top
  • © 2011-2023 Department of Education Aruba (DEA)
  • T +297-528-3400
  • F +297-528-3434
  • info@ea.aw

By orbitalnets