Search Facebook Instagram Twitter

Ley cu ta regula Arubalening a keda formalisa

June 1, 2017

Minister di Enseñansa (Hooyboer-Winklaar) hunto cu Minister di Finansas (Bermudez) a anuncia e formalisacion di e ley cu ta regula financiamento di estudio pa studiantenan di Aruba, conoci como Arubalening.

E formalisacion di e Landsbesluit Voorwaarden Studieleningen ta uno historico mirando cu esaki ta pa prome biaha den 31 aña di Status Aparte di Aruba cu tin un ley cu ta regula financiamento di estudio y cu ta inclui tur e condicionnan na un manera cla y transparente. Den pasado semper a traha cu contractonan cu tabata wordo adapta cada aña. E formalisacion di e ley tambe ta historico pa e hecho cu a logra adapta y inclui varios condicion na beneficio di studiante.

E ley a keda firma pa Gobernador di Aruba y pa ambos mandatario y lo drenta na vigor dia 1 di juni 2017.

E ley ta conta pa tur studiante existente, tur ex-studiante cu un debe actual di Arubalening y tambe pa tur studiante nobo.

E comision cu a traha riba e ley a consisti di representantenan di Ministerio di FinansasMinisterio di EnseñansaDirectie WetgevingDirectie Onderwijs y Directie Financiën kende a precidi e comision.


E adaptacionnan

E adaptacionnan di mas importante ta como lo siguiente:

1. Interes

E aspecto di interes di financiamento di estudio ta e parti cu a conoce e cambionan di mas drastico na beneficio di studiante. E interes den e Landsbesluit awo a wordo stipula na 2% enkelvoudig y ta cuminsa core na momento cu e studiante cuminsa paga bek (aflossingsperiode). No ta acumula interes desde momento cu sera contract of durante di estudio. E percentage nobo ta conta di manera retroactivo pa tur studiante existente of ex-studiante cu un debe actual di estudio di Arubalening. Akibou por haya un bista di e cambionan den e interes durante e ultimo añanan a base di e contractonan di Arubalening cu a keda formalisa:

Studiejaar Rente Aflossing
2011 t/m
2013-2014
6% Samengesteld Interes ta wordo acumula desde e prome pago na e studiante despues cu a firma e contract y ta sigui te na e momento di e ultimo aflossing di e lening
2014-2015  6% Samengesteld Interes ta wordo acumula desde e prome pago na e studiante despues cu a firma e contract y ta sigui te na e momento di e ultimo aflossing di e lening.
2015-2016 3% Samengesteld Interes ta wordo acumula desde e prome pago na e studiante despues cu a firma e contract y ta sigui te na e momento di e ultimo aflossing di e lening.
2016-2017 3% Enkelvoudig Interes ta cuminsa core na momento cu e studiante cuminsa paga bek (aflossingsperiode). No ta cobra interes mas desde momento cu sera contract of durante di estudio.
2017-2018 2% Enkelvoudig Interes ta cuminsa core na momento cu e studiante cuminsa paga bek (aflossingsperiode). No ta cobra interes mas desde momento cu sera contract of durante di estudio.


2. Periodo maximo pa paga bek

Durante e ultimo añanan e periodo maximo pa paga e debe di estudio bek tabata stipula na 15 aña. Awo esaki a bira un periodo maximo di 20 aña. E studiante mes por scoge pa paga den menos tempo dependiendo di su “draagkracht”. E studiante por scoge pa paga un suma mas halto pa pa luna y caba di paga e fiansa den menos tempo of e studiante por scoge pa paga menos pa luna durante un periodo mas largo.



3. Suma di Arubalening pa Merca y Canada

E suma maximo pa Merca y Canada a subi di Afl. 102.000,- pa Afl. 140.000,- totaal. Tur esaki ta parti di e maneho pa haci studia na Merca y Canada mas accesibel pa nos studiantenan.


4. Producto apart pa financiamento di Masteropleiding

Antes no tabata tin un producto di Arubalening apart pa Masteropleiding. Awo a crea un opcion apart pa financiamento di estudio pa un Masteropleiding te na un maximo di Afl. 42.000,-.


5. Inscribi na Aruba

Banda di condicionnan di nacionalidad e studiante mester demonstra cu e tin un minimo di 5 aña inscribi na Censo como cuidadano biba na Aruba. Pa studiantenan Arubiano cu ya ta den exterior a hacie posibel cu nan por aplica pa bin na remarke pa un lening pa haci un Masteropleiding den caso cu nan tin maximo 7 aña uitgeschreven di Aruba.


6. Edad

E edad maximo pa bin na remarke pa Arubalening semper tabata stipula na 30 aña. Awo a hacie posibel pa personanan te cu 35 aña tambe por aplica y bin na remarke pa un Arubalening den caso cu esaki ta pa studia na un di nos institutonan local cu ta wordo reconoci pa ley. E adaptacion aki ta forma parti di e maneho pa hisa accesibilidad di enseñansa pa nos poblacion pa asina un grupo mas grandi di hende tin acceso na financiamento pa studia riba nivel di enseñansa superior.


Landsbesluit

Mas informacion:

ea.aw > Documento & Publicacion > Ley > Studie > Landsbesluit voorwaarden studieleningen


Minister Hooyboer-Winklaar ta sumamente contento cu e proceso y e resultado final cu a keda formalisa cu ta na beneficio di nos studiantenan. Segun e mandatario e punto di salida semper ta loke ta na interes di nos studiantenan y alabez teniendo na cuenta loke ta responsabel pa pais Aruba. E titular di enseñansa ta gradici su colega Minister di Finansas y e commission y e departamentonan cu a traha den un team multidisciplinario pa realisa e ley importante aki y ta convenci cu esaki lo tin un impacto positivo pa nos studiantenan, profesionalnan hoben y consecuentemente riba e desaroyo di nos pais.

 


Info / Contact

Pa mas informacion por busca den e alfabet menu riba homapage: [A] Arubalening of por tuma contacto cu DEA > seccion Studiafaciliteiten

Ta sugeri pa studiantenan acudi regularmente na nos website [ea.aw] como tambe sigui Departamento di Enseñansa via facebook na @educationaruba.

Scroll To Top
  • © 2011-2023 Department of Education Aruba (DEA)
  • T +297-528-3400
  • F +297-528-3434
  • info@ea.aw

By orbitalnets