Juffrouw Altman trahando hopi aña den Enseñansa cu amor

November 8, 2016

Recientemente a tuma luga e di dos edicion di Appel di Oro, cual ta un ceremonia unda ta duna reconocimento na diferente docente cu a destaca durante aña escolar.

Un di e personanan cu a ricibi reconocimento tabata Juffrouw Yvonne Altman kende ta traha na Scol Paso pa Futuro.  El a cuminsa na Prins Bernhard School unda e tabata tin un klas cu tabata e muchanan di Dun’un Man y door cu no tabata tin scol ainda pa nan, el a cuminza cu e klas ora cu el a bin for di Hulanda.

Despues Juff. Altman a muda pa scol special y te awo e ta traha na EPB Aspiranten Afdeling unda e ta sigui e muchanan cu ta bin for di scol special pa nan continua cu nan trayectoria avanza, el a splica. Despues di su pension el a bay bek na su scol unda el a cuminza cu e muchanan special. Aworaki e ta prepara nan pa Scol Practico pa Ofishi.

Yvonne Altman a duna di conoce cu e ta hopi contento cu e Appel di Oro. E no tabata spera esaki y tabata un sorpresa p’e. “Mi a bira hopi nervioso pasobra ami no ta un speaker, pero mi ta hopi contento y mi ta bay echt pone un lugar unda tur dia mi por wak’e. Mi ta sigui haci mi best pa mi por guia e muchanan pasobra echt e muchanan mester di nos como enseñanza pasobra mi no sa si tin otro hende cu por yuda nan“, el a expresa.

Mester agrega cu Juffrouw Altman su casa, Meneer Rick Altman a wordo nomina pa e Appel di Oro den e categoria di Lifetime Achievement Award. El a traha te aña escolar pasa na Filomena College MAVO. El a yega di traha na EPB San Nicolas como jaarlaag coordinator. Despues e la bira maestro. Un maestro ehemplar. Rick hunto cu su casa a traha hunto na EPB den e Aspiranten Afdeling. Aunke Rick a bay cu pension el a keda activo. El a sigui traha den MAVO Scholen di Aruba na San Nicolas dunando e vak di Hulandes. Aña escolar 2015-2016,  Rick na un edad di 79 aña a keda traha dunando les di Hulandes den Examen Klas, locual sigur ta algo di aplaudi.

Minister di Enseñansa, Michelle Hooyboer-Winklaar ta expresa palabranan di pabien na Juffrouw y Meneer Altman pa nan dedicacion na bienestar di nos sistema di enseñansa.

 


Info | Contact

Pa mas informacion por busca den e alfabet menu riba homepage: [A] Appel di Oro of por tuma contacto cu: Departamento di Enseñansa Aruba | Ministerio di Enseñansa

Scroll To Top
  • © 2011-2019 Department of Education Aruba (DEA)
  • T +297-528-3400
  • F +297-528-3434
  • info@ea.aw