Gobierno di Merca ta para restriccion imponi riba studiantenan internacional

July 16, 2020

E administracion di Presidente Trump a para e decision relaciona cu e “Student and Exchange Visitor Program” (SEVP) anuncia pa “US Immigration and Customs Enforcement” dia 6 di juli ultimo.

Minister Plenipotenciario di Aruba na Washington DC Joselin Croes ta informa tur studiante di Aruba cu tin intencion pa bay studia na Merca of cu ta studiando na Merca pa tuma nota cu dia 14 di juli 2020, e administracion di Presidente Trump a para e decision anuncia dia 6 di juli ultimo, di no duna Visa na studiantenan cu nan scol ta 100% online.


Caso legal

Despues cu Harvard University y Massachussetts Institute of Technology a lanta un caso contra e administracion di Trump pa e decision pa nenga Visa y/of kita Visa di tur studiante internacional cu nan lesnan ta 100% online, un cantidad di 300 otro universidad di Merca a uni nan mes na e caso legal aki y a vocifera cu e decision aki tin un impacto negativo no solamente pa e studiante internacional pero tambe pa e scolnan cu ta depende di e entrada di tur e studiantenan aki.

Alabes nan a mustra riba e hecho cu e decision aki lo obliga nan pa duna les en persona cual lo subi e risico di contagio di COVID-19.

Hues Allison Borroughs a duna di conoce cu e administracion di Presidente Trump a retracta nan decision tuma siman pasa y lo bay over bek na e maneho bieu.


Studiante di Aruba

Minister Plenipotenciario Croes a subraya cu na Merca tin mas di 1 miyon di studiante internacional cu lo keda afecta door di e regla nobo aki imponi siman pasa. E decision aki a crea un alivio grandi pa hopi studiante cu diripiente tabata den un incertidumbre grandi pa cu nan futuro.

Esaki ta nifica cu tur studiante di Aruba cu ta studiando na Merca of tin intencion di bay studia na Merca por haci esaki trankil hasta si nan lesnan ta 100% online.


Info / Contact

Scroll To Top
  • © 2011-2019 Department of Education Aruba (DEA)
  • T +297-528-3400
  • F +297-528-3434
  • info@ea.aw