Estudio pa Ofishi

November 21, 2016

Durante e ultimo dos lunanan un comision a reuni intensivamente pa crea posibilidadnan duradero pa e studiante cu ta desea di sigui in estudio di vocacion den oranan di anochi.

Den cuadro di e vision di Minister di Enseñansa Michelle Hooyboer-Winklaar, relaciona cu Enseñansa pa Bida (Lifelong Learning), un comision consistiendo di representantenan di Departamento di Enseñansa Afdeling CurriculumExamenbureau, Dienst Inspectie van het Onderwijs y directiva di Openbare Avondleergangen Aruba (OAA) a traha riba un proyecto di adaptacion y renobacion di opleidingen pa OAA.

Ta trata aki di e prome fase di un proyecto cu tin como meta ofrece cursonan conforme exigencianan reconoci pa Gobierno di Aruba y den exterior.

Den e ultimo dos lunanan e comision a reuni intensivamente pa crea posibilidadnan duradero pa e studiante cu ta desea di sigui un estudio di vocacion den oranan di anochi. Pa stimula inclusion den Enseñansa Vocacional a tene cuenta cu e necesidad di e adulto como studiante, su espacio pa sigui desaroya como un Studiante pa Bida y tambe fortalece su posibilidadnan den sector laboral.

Studiante adulto

Teniendo na cuenta e necesidadnan di un studiante adulto y su forma di siña ta diferente cu di un mucha, a scoge pa standardnan dirigi riba Enseñansa Vocacional cu ta igual e programanan ofreci den oranan regular di scol.

Pa cumpli cu e necesidadnan di e grupo meta a scoge pa ofrece e materianan cu e studiante tin mester pa por eherce un ofishi na un forma responsabel. E desaroyonan cu a tuma luga lo drenta na vigor entrante Januari 2017, esta lo reconoce Opleidingen basa riba standard, lo aplica rekisitonan di vooropleiding pa cursonan y nivelnan unda ta necesario, lo legitima examennan den forma externo pa Examenbureau y lo introduci examennan practico.

Lo ofrece e cursonan pa semester y den forma modular. Balor di esaki ta cu e studiante lo finalisa cada modulo cu un deelcertificaat cu e por acumula y despues intercambia pa un diploma. Di e forma aki e studiante por scoge si e ta desea di sigui solamente e parti di e programa cu ta enfoca riba e ofishi di su escogencia of si e ta desea di sigui tur e modulonan pa asina yega na su diploma.

Idioma

Pa elimina bareranan di idioma a scoge pa Papiamento ta e idioma obligatorio pa yega na un diploma hunto cu un idioma di escogencia di e studiante. Posibilidad di e idiomanan banda di Papiamento ta HulandesIngles y Spaño. E studiante cu tin interes pa fortalece su uzo di idioma den sector laboral tambe por sigui modulonan di idioma na OAA.

Nivel

E opleidingen cu lo ofrece den e prome fase di e proyecto aki ta opleidingen riba nivel 1 cu ta e nivel den cual ta desaroya e habilidadnan basico di e ofishi pa asina fungi como un assistent. Alabes ta ofrece opleidingen di nivel 2 cu ta e nivel caminda lo desaroya habilidadnan mas avansa cerca e studiante pa asina por practica su ofishi den un forma independiente.

E opleidingen cu lo ofrece na Januari tin diferente rumbo di specialisacion y esakinan ta den nivel 1assistent den construccion (carpinte, metsla), assistent den moda y vestuario (costumiere, bendedo den moda), assistent mecanico (parti 1), assistent mecanico (parti 2), assistent mecanico di mantencion manera “Bouw in de onderhoud”, “Eletrotechniek bij installaties”, “Metaaltechniek bij installaties”, “Basisvaardigheden installatietechniek”, “Basislassen”, “Basisvaardigheden mechanische techniek” y “Onderhoud bij koeltechniek”.

Den e seccion di nivel 2 lo ofrece curso como welderdo (A&B), carpinte (parti 1 y 2), mode y vestuario (coupeuse) y como bendedo y diseñador di moda.

Den e proximo lunanan e comision lo sigui traha riba opleidingen di nivel 1 te cu 4 (MBO) cu ta enfoca riba otro sectornan di labor.

Pa facilita e escogencia di e studiante y su caminda pa exito den su carera OAA lo tin un profesionalnan pa guia e studiante den su necesidadnan y interesnan pa cu su carera. Lo tene cuenta cu studiantenan cu a base di nan competencianan y conocemento den casonan cu un vrijstelling por ta aplicabel.

Minister Michelle Hooyboer-Winklaar ta encurasha tur studiante cu ta desea pa sigui desaroya nan mes pa nan progreso laboral pa aplica pa un di e cursonan ariba menciona. Inscripcion ta tuma luga na oficina di OAA na EPB HATO desde 3’or di atardi of tuma contacto cu scol na info@oaa.aw of na telefon 582-7324.

 

Director di OAA

Director di OAA“Studiantenan lo sigui e programa na nan propio midi, segun nan conocemento y habilidad nan individual.”

Director di Openbare Avondleergangen Aruba (OAA)Claudia Whitfield, ta satisfecho cu e desaroyo nobo tumando luga na OAA, unda cu ta trahando awo cu un loopbaanbegeleider, kende ta guia e carera di e studiantenan. E ta asisti studiantenan pa por sigui e programa na nan mesun midi, esta teniendo na cuenta nan experiencia y habilidadnan prome cu nan drenta e programa pa asina no haya nan mes uzando tempo valioso ripitiendo un topico cu ya ta algo conoci pa e studiante.

Openbare Avondleergangen Aruba ta bay ofrece diferente opleiding basa riba e startkwalificatieesdi e alumno, cu ta tene na cuenta e situacion pa cu conocemento y habilidadnan di cada alumno riba su mes na momento cu e ta cuminsa cu e opleiding.

 

Den cada opleiding tin specialisacion, por ehempel den construccion/”bouw” tin dos parti, “timmeren” (carpinteria) y “metselen” (metsla). E studiante por tuma cada curso separa, pero si e caba tur dos e ta logra haya su diploma.

Diferente di e otro cursonan tambe tin e mesun sistema, segun Claudia Whitfield a agrega. Mayoria persona cu cuminsa e cursonan na Januari lo cay den e categoria di studiantenan cu lo sigui e curiculo basa riba nan startkwalificaties. Hopi di e studiantenan aki ta alumnonan cu a stop cu un opleiding pa un of otro motibo, pero kier cuminsa bek pa logra nan certificado y/of diploma.

Pa hopi persona cu ta sigui cursonan di OAA studiamento ta tuma un esfuerso adicional como cu nan ta traha tambe. Mester ta hopi flexibel, Whitfield a bisa, añadiendo cu e ta valioso pa e studiante cu ta tene cuenta cu loke e sa caba pa asina e evita di mester ripiti loke e sa caba y por inverti su tempo den siña cosnan nobo y move mas lihe padilanti den e curso.

 


Info / Contact

Pa mas informacion por busca den e alfabet menu riba homepage: [E] Educacion pa Adulto of por tuma contacto cu: Ministerio di Enseñansa

Scroll To Top
  • © 2011-2019 Department of Education Aruba (DEA)
  • T +297-528-3400
  • F +297-528-3434
  • info@ea.aw