Envolvimiento di mayornan ta crucial

November 7, 2016

Un di e iniciativanan cu Ministerio di Enseñansa tabata tin durante Luna di Enseñansa ta encera e envolvimento di e mayornan.

Minister di Enseñansa, Michelle Hooyboer-Winklaar a enfatiza cu esaki ta esencial pa e bienestar y desaroyo di e hoben. Mester tin un mayor cu ta hopi envolvi den tur aspecto di e bida di nan yiu. Entre otro scol pero tambe otro aspectonan delicado y cu ta dificil pa e mayornan habri un combersacion cu nan yiu riba dje y un di nan ta e topico di sexualidad.

Tienda di Educacion ta existi pa algun aña caba y su meta ta pa duna sosten na mayornan. Duna nan e forza y e hermentnan pa por trata cierto temanan cu ta delicado manera esun di sexualidad como tambe otro temanan manera bullying, aspectonan emocional, alimentacion, entre otro.

E topico aki di sexualidad ta un di nan cu Tienda di Educacion a pensa cu por bin cu un charla durante Luna di Enseñansa.  A organiza  e anochi aki pa mayornan pero tambe pa educadornan. “Nos ta hopi contento cu nos por trece e informacion aki dilanti pa poco poco wak tur e otro maneranan pa por brinda nos studiantenan un experiencia completo. No solamente experiencia di scol, pero tambe kico ta e cosnan cu ta touch nan na cas y tambe na scol cu nos por informa mihor e mayornan y asina ta traha e driehoek eynan“,  Minister Hooyboer-Winklaar a indica. Mayor, scol y studiante.

Tur hende lo papia e mesun idioma y con pa anda cu cierto temanan. Mester cera e driehoek aki  y fortalec’e pa yuda e studiante ta exitoso, den bida y vooral na scol. Tienda di Educacion tey pa tur sorto di topico. 161 ta nan number cu por yama cualkier momento y nan lo tey pa duna informacion y guia.

Nicole Kock ta un consehero na Tienda di Educacion y durante e workshop el a elabora riba e desaroyo di e mucha entre 0 y 19 aña. A papia riba e cambionan den e curpa y banda di esey a duna mayornan conseho con pa papia cu nan yiu tocante sexualidad.
Mayornan tin biaha ta sinti berguenza, miedo pa papia cu e yiu siendo cu esey ta algo hopi importante. “Den e workshop aki kier a mustra cu esey ta algo masha natural y con por papia cu bo yiu na un manera positivo”, el a subraya.

E combersacion tocante sexualidad tambe mester encera norma y balornan y di mes con nan por proteha nan mes. Pa cu esaki ta referi nan na Famia PlaneaKock a indica.

Un di e mayornan cu a asisti e anochi aki tabata Janga Shanissekende a duna di conoce cu el a haya e informacion hopi valioso. E tin un yiu den e edad aki entre 9 cu 15 aña. E tips tabata na su lugar y awor e mester por sa con pa reacciona ora di papia cu su yiu.
E ta opina cu ohala mas mayor lo por asisti na e tipo di charlanan aki ya cu tin hopi informacion cu nan por haya, Janga a señala.

Finalmente, Rischma Tromp a expresa cu e charla aki ta yuda e mayor con pa acerca e yiu y papia cun’e riba cierto temanan. E ta haya cu e eventonan aki mester tuma lugar mas biaha pasobra tambe tin e grupo di mamanan jong y tin falta di guia. Nos ta bibando den un temporada diferente compara cu tempo cu nos a bay scol. Pesey e ta kere cu pa medio di mas informacion na scol of charlanan pa mayornan lo ta na su lugar aworaki.

 


Info | Contact

Pa mas informacion por busca den e alfabet menu riba homepage: [L] Luna di Enseñansa of por tuma contacto cu: Ministerio di Enseñansa

Scroll To Top
  • © 2011-2019 Department of Education Aruba (DEA)
  • T +297-528-3400
  • F +297-528-3434
  • info@ea.aw