Edgard “Eddy” Ras a ricibi un sorpresa grandi y placentero

October 31, 2016

Den su 34 añanan trahando cu Cuerpo Policial, di cual 17 aña e ta bin dedicando na enseñansa di Cuerpo Policial, Edgard “Eddy” Ras no a spera ni imagina cu e lo tin e honor di ricibi un reconocemento pa su esfuersonan pa cu enseñansa.

Durante e anochi di e ceremonia di Appel di Oro, a sorprende e Sub Inspector di Polis cu no un, pero dos reconocemento a na Academia di Husticia Aruba, esta Scol pa Polis Edgar J. “Watty” Vos.

Appel di Oro pa e Proyecto di Enseñansa Superior a bay pa e proyecto “Justitiebreed opleiden”. E proyecto aki ta e proceso andando na e scol pa logra integra tur opleiding cu tin di haci cu husticia hunto na Academia di Husticia. E meta cu esaki ta pa logra educa tur esunnan envolvi riba e mesun nivel pa nan ta riba e mesun liña.

Eddy Ras a comenta cu orguyo el a ricibi e reconocemento aki cu brasa habri den nomber di miembro di personal y staf di e academia policial. Pa loke ta e Appel di Oro personal, cual Eddy Ras a ricibi como Maestro di Aña 2016, categoria Enseñansa Superior, el a bisa cu e tambe tabata un sorpresa, nunca el a traha pa un reconocemento y e no a sper’e.

Eddy Ras ta gradici tur persona cu a nomin’e, su coleganan, docentenan y e team dinamico di Academia di Husticia. E la conclui bisando cu e team di Academia di Husticia ta traha hunto manera un mesa rondo, nan ta reuni y tuma decisionnan hunto.

 


Info | Contact

Pa mas informacion por busca den e alfabet menu riba homepage: [A] Appel di Oro of por tuma contacto cu: Departamento di Enseñansa Aruba | Ministerio di Enseñansa

Scroll To Top
  • © 2011-2019 Department of Education Aruba (DEA)
  • T +297-528-3400
  • F +297-528-3434
  • info@ea.aw