Prome Manual di Gramatica di Papiamento

December 1, 2011

Diaranson 30 di November 2011, a tuma luga un anochi unico pa presenta y celebra publicacion di e prome manual di gramatica di Papiamento di Departamento di Enseñansa Aruba.

 Biblioteca Nacional na Bachstraat a habri su portanan pa e invitadonan di e evento festivo aki. Dignatarionan, autornan, corectornan y maestronan tabata entre e publico presente cu a bin admira e buki.

Pa trece ambiente y duna un toke special na e anochi aki, tabata presente Rincon Boys y e poetanan Rosabelle Illes, Selvia Lumenier cu declamacion di Diana Marchena, y ganador di Arte di Palabra 2010, Laura Kock.

Manual di Gramatica di Papiamento – Morfologia ta un publicacion di Departamento di Enseñansa Aruba. E manual ta dirigi na tur hende cu ta interesa pa haya un bon conocemento di gramatica di Papiamento. E buki, cu tin un tremendo potret di e cuebanan na Canashito riba kaft, cortesia di Museo Arkeologico Nacional di Aruba, ta bay tur scol como material di sosten pa maestro. Prensa, departamentonan di gobierno y tur instancia of fundacion cu por haci bon uzo di dje tambe por conta cu un ehemplar. Entrante januari 2012 lo cuminsa cu distribucion di e manual di gramatica.

E herment valios aki pa nos idioma materno a wordo publica despues di un trayecto largo, cu tabata encera trabou intensivo cu hopi discusion pa fiha e contenido y tene cuenta cu tur detaye.

E grupo di trabou, cu tabata consisti di Sra. Elvia Solognier-Croes, Sr. Etley Lasten, Sra. Selvia Lumenier, Sr. Juan Maduro, Sra. Filomena Schwengle, Sr. Ramon Todd Dandaré, Sr. Pedro Velazquez, por ta sumamente satisfecho cu e producto final. Diseño di e buki bunita aki tabata den man di Sra. Sheila Werleman.

A crea e obra aki haciendo uzo di materialnan existente di gramatica, cu e meta pa traha un manual cu ta trata di un manera basico y structura tur e categorianan di palabra. E grupo di trabou mes ta indica cu mas nan a profundisa den e materia, mas pregunta a lanta. Esey ta duna di conoce cu falta hopi mas investigacion y cu esaki lo por ta un trabou cu por tuma luga den cuadro di e estudio di Master di Papiamento na Universidad di Aruba.

 


Info / Contact

Pa mas informacion por busca den e alfabet menu riba homapage: [P] Papiamento of [P] Proyecto Scol Multilingual por tuma contacto cu Departamento di Enseñansa Aruba (DEA).

Scroll To Top
  • © 2011-2019 Department of Education Aruba (DEA)
  • T +297-528-3400
  • F +297-528-3434
  • info@ea.aw