Deliberacion avansa pa acuerdo cu CALDO

July 18, 2016

Recientemente Minister di Enseñansa Michelle Hooyboer-Winklaar a reuni cu dr. Carolyn Watters, Presidente di CALDO Consortium na Canada, un organisacion cu actualmente ta representa 9 universidad prestigioso na Canada y cu ta fungi como e “gateway” entre Latino America y Canada riba tereno di enseñansa superior.

E titular di enseñansa ta menciona cu Ministerio di Enseñansa di Aruba ya tin algun luna di deliberacion cu CALDO Consortium y ta contento di informa cu e deliberacionnan ta den un fase avansa pa asina Aruba por formalisa un acuerdo cu e organisacion aki.

Ta trahando riba e acuerdo pa asina duna nos studiantenan Arubiano acceso na mas opcion di estudio atractivo na Canada.

Den e contacto y deliberacionnan Ministerio di Enseñansa di Aruba ta wordo sosteni pa e Embahada Canades na Caracas Venezuela cu ta haciendo un bon papel den promove y posiciona Aruba como un bon partner riba e tereno di enseñansa pa institutonan Canades.

CALDO consortium su meta ta pa forma un gateway entre Latino America y Canada y asina stimula Canada como un opcion atractivo pa studiantenan di e region aki. E nuebe universidadnan cu CALDO consortium ta representa ta localisa den e diferente provincianan di Canada y ta inclui universidadnan grandi y renombra manera University of Alberta, University of Calgary, Dalhousie University, Université Laval, University of Ottawa, Queen’s University, University of Saskatchewan, University of Waterloo y Western University.

CALDO consortium ta promove “higher education mobility”, “capacity building” y “research cooperation”. E organisacion ta cera acuerdonan di cooperacion y intercambio cu gobiernonan nacional, organisacionnan gubernamental y tambe cu universidadnan.

Mayoria di e acuerdonan cu CALDO Consortium tin formalisa ta encera entre otro “matching” di studiantenan cu kier haci nan Master of PHd cu un di e “research universities” y tambe ofrece “in-province tuition fee”, esta un tarifa local, pa studiantenan cu ta wordo financia door di nan pais y kier sigui nan estudionan na un di e nuebe universidadnan afilia na CALDO. E ultimo aki ta un bentaha grandi pa nos studiantenan di Aruba.

Actualmente CALDO Consortium tin acuerdonan formalisa cu diferente pais manera Brazil, Chile, Colombia, Ecuador, Mexico, Peru, Paraguay y Uruguay. Tin tur indicacion cu Aruba lo ta e prome pais di Caribe cu lo formalisa un acuerdo cu CALDO Consortium.

Minister Hooyboer-Winklaar ta sumamente entusiasma cu e desaroyo aki y ta trahando duro pa finalisa e detayenan y asina logra formalisa e acuerdo importante aki pa nos studiantenan di Aruba. E titular di enseñansa ta menciona cu e tin un compromiso pa sigui explora mas opcion pa nos studiantenan y pa habri mas porta pa asina nos futuro generacionnan por beneficia di tur e acuerdonan aki.

Website: [CALDO]

 


Info / Contact

Pa mas informacion por busca den e alfabet menu riba homepage: [S] Studia na Canada of por tuma contacto cu DEA > afdeling Studiefaciliteiten.

Scroll To Top
  • © 2011-2019 Department of Education Aruba (DEA)
  • T +297-528-3400
  • F +297-528-3434
  • info@ea.aw