Colaboracion entre Maryland y Aruba

May 19, 2016

Dia 9 di mei ultimo a tuma luga un serie di reunion entre Minister di Enseñansa di Aruba y representantenan di Gobierno di Maryland, esta Secretaria di Estado di Maryland y Minister di Enseñansa. Meta principal di e reunionnan tabata pa sondea posibilidad nan riba tereno di Enseñansa.

Maryland ta un di e estadonan di mas chikito den termino di grandura, pero di otro banda e ta un di e estadonan mas pobla, den termino di densidad, cu mas o menos 6 miyon habitante. Cu proximacion na e capital di Merca, combina cu un economia bon diversifica den servicio, biotecnologico y di fabricacion, Maryland tin e populacion di mas grandi di cu e “Median household income” compara cu tur otro estado Mericano.

Durante e reunionnan Minister Michelle Hooyboer-Winklaar a splica e maneho pa Enseñansa superior y e progreso cu te cu awor tin pa diversifica opcionnan disponibel pa nos studiantenan.

E representantenan di Gobierno di Maryland ta mira studiantenan di Aruba como un bon “fit” den e panorama pa internacionalisa e studiantenan cu ta studia eynan. Ta intencion di Maryland pa crea un bon populacion hopi diversifica na e universidadnan.

Intencion ta pa cuminsa traha riba un MOU cu ta defini e varios puntonan di colaboracion y intercambio riba tereno di Enseñansa entre e Gobierno di Maryland y Gobierno di Aruba. Minister Michelle Hooyboer-Winklaar lo topa tambe cu 2 universidad na Maryland durante su bishita na Merca.

 


Info / Contact

Pa mas informacion por busca den e alfabet menu riba homepage:  [S] Studia na Merca  of por tuma contacto cu DEA > afdeling Studiefaciliteiten.

Scroll To Top
  • © 2011-2019 Department of Education Aruba (DEA)
  • T +297-528-3400
  • F +297-528-3434
  • info@ea.aw