Aumento den cantidad di alumno pa ciclo basico HAVO/VWO

August 1, 2016

Conforme informacion oficial ricibi di Inspector General di Enseñansa, un total di 292 alumno lo inicia aña escolar nobo den ciclo basico 1 na Colegio Arubano Colegio San Nicolaas.

Respectivamente un cantidad di 254 alumno lo start na Colegio Arubano y un cantidad di 38 alumno lo cuminsa cu nan trayectorio na Colegio San Nicolas. Esaki ta un cantidad considerablemente mas halto compara cu añanan anterior cu tabata conta un averahe di 200 alumno na ambos ciclo basico. Esaki ta representa un aumento di mas cu 40%.

E aumento significante aki ta debi na e hecho cu desde e aña escolar aki Minister di Enseñansa Michelle Hooyboer-Winklaar a logra formalisa e adaptacionnan necesario den ley pa nacionalisa e norma di admicion y elimina e practica unda cu e “Colegiotoets” ta conta como e unico factor pa admicion.

A base di e adaptacionnan den ley a revisa e normanan di admicion pa ciclo basico pa HAVO/VWO incluyendo mas componente pa asina e evaluacion di e alumno ta uno mas husto teniendo na cuenta su capacidad y potencial completo.

Ainda tin varios elemento pa cu transicion di scol basico pa scol secundario y specialmente e aspecto di admicion pa scol secundario cu mester wordo evalua y adapta. E comicion instala lo sigui reuni y cuminsa prepara y traha riba e maneho y normanan di admicion pa aña escolar 2017-2018 pa asina esaki por ta cla na tempo y por wordo comunica na tur scol y na publico general.

Minister Hooyboer-Winklaar ta enfatisa cu mester sigui traha continuamente na mehora e conexion y transicion entre e diferente tiponan di enseñansa cu ta forma parti di nos sistema educacional. Ministerio di Enseñansa hunto cu e directivanan di scol ta trahando riba implementacion di metanan cla y consistente pa enseñansa primario, riba normanan di admicion mas husto, completo y valido pa admicion y ta invertiendo den mas guia y sosten na alumno pa asina yuda nan pa ta mas exitoso den nan carera escolar.

Minister di Enseñansa kier stimula mas cooperacion y intercambio di informacion den nos sistema educacional entre e diferente tiponan di scol pa asina nos por yega na un sistema educacional mas coherente. E titular di enseñansa ta convenci cu esaki lo elimina hopi di e bareranan actual y cu na final lo beneficia e alumnonan y tur actor envolvi grandemente.

Minister Hooyboer-Winklaar ta desea tur alumno hopi exito y ta sigur cu ambos Colegio Arubano Colegio San Nicolas lo haci lo maximo pa sostene y guia tur alumno pa nan ta exitoso.

 


Info / Contact

Pa mas informacion por busca den e alfabet menu riba homepage: [E] Enseñansa Secundario of por tuma contacto cu  [M] Ministerio di Enseñansa.

Scroll To Top
  • © 2011-2019 Department of Education Aruba (DEA)
  • T +297-528-3400
  • F +297-528-3434
  • info@ea.aw