Appel di Oro 2016
Ministerio di Enseñansa hunto cu Departamento di Enseñansa Aruba tawatin e honor pa organisa un biaha mas e proyecto di reconocemento Appel di Oro, Premio Nacional di Excelencia den Enseñansa.
E Appel di Oro a bira un simbolo pa excelencia den enseñansa. No solamente e ta identifica di e trabao excelente di e nominado y ganadonan, pero e ta simbolico pa e trabou excelente cu ta tuma luga tur dia den enseñansa na Aruba.
Minister di Enseñansa Michelle Hooyboer-Winklaar a agrega na e encuentro ameno, alegre y inspirativo diabierna anochi, cu e evento cu cual a cera e celebracion di Luna di Enseñansa 2016 ta un dedicacion, un momento pa honra esunnan cu ta haciendo algo sumamente importante pa nos pais.
Hopi di esunnan cu a gana ta esunnan cu a dedica henter nan bida profesional y un bon parti di nan bida personal na e tema di enseñansa, Minister Hooyboer-Winklaar a bisa, expresando aprecio pa e ganadonan y e nominadonan.
E reconocimento Appel di Oro ta “lo minimo cu nos por haci pa esunnan cu ta carga asina un responsabilidad grandi cu hopi amor,” e mandatario a comenta.
Enseñansa ta riba caminda corecto y si sigui pone e studiante central den tur loke wordo haci lo logra hopi mas den enseñansa, Minister Hooyboer-Winklaar a subraya, y yega na e meta pa tur studiante, sin excepcion di nivel di habilidad, ta exitoso. Esaki ta e meta principal di enseñansa, el a agrega, y si tur persona traha riba e mesun meta lo yega mucho mas leu y ta garantisa un miho futuro pa nos studiantenan y nos pais, el a conclui bisando.
Minister Michelle Hooyboer-Winklaar ta felicita tur nominado y e ganadonan di Appel di Oro 2016, y ta gradici y expresa su admiracion pa cu nan dedicacion, amor y energia positivo cu nan ta inverti tur dia den e logronan di e muchanan, hobennan y adultonan cu ta participa den e mundo di enseñansa na Aruba.
 |
E ganadonan den e diferente categorianan ta como lo siguiente.
Maestro
“Maestro di Aña” den Scol Primario ta Levi Geerman (Scol Basico Kudawecha), Scol Secundario: Annette Peterson-Bredie (Colegio Arubano), Scol Special: Yvonne Altman (Scol Paso Pa Futuro) y Scol Superior: Edgar Ras (Academia Policial Aruba).
Dirigente
Como “Dirigente di Aña” a scoge pa Scol Primario: Lorena Boekhoudt (Scol Preparatorio Washington), Scol Secundario: Erwin Lopez (EPB San Nicolas), Scol Secundario: Roseanna Garrido (Maria College MAVO), Scol Special: Sharline Geerman-Rodriguez (Scol Dun’un Man) y Scol Superior: Tim Croes (Universidad di Aruba).
Actor di Sosten
Como “Actor di Sosten di Aña” a scoge den Scol Primario: Susan Haime (IB-er di Colegio Frere Bonifacius), Scol Secundario: Adriana del Rosario Dorothal-Contreras (Trahado Social di EPB San Nicolas), Scol Special: Angelique Trimon (Klassenassistent di Scol Paso Pa Futuro) y Scol Superior: Irina Croes (Trahado Social di Colegio EPI).
Newcomer
Como “Newcomer of the Year” a scoge den Scol Primario: Anneliese Werleman (Colegio San Hose), Scol Secundario: Celio Vrolijk (C.G. Abraham de Veerschool) y Scol Special: Adrielle Geerman (Scol Practico pa Ofishi).
Lifetime Achievement
Como “Lifetime Achievement Award” a scoge Yin May Wong, dirigente di Scol Special Scol Paso Pa Futuro.
Proyecto Escolar
Den demas premionan a entrega un Appel di Oro pa uzo di tecnologia moderno den klas na Sint Paulus School, Proyecto den Scol. Proyecto den Scol, Secundario: Stichting Sociaal Fonds Colegio Arubano, Proyecto den Scol, Primario: Wela di Scol di Caiquetio School y pa Proyecto den Scol Superior a bay pa “Project Justitiebreed Opleiden” di Academia Policial Aruba.
Scroll To Top
