Proyecto Escolar 2015


iPad Project

Den cuadro di desaroyo y inovacion den enseñansa e Colegio Frère Bonifacius a tuma iniciativa pa introduci iPad den klas. Un grupo nucleo di scol a traha riba tur e preparacionnan.

E compania Mac4u a yuda scol den e diferente presentacionnan cu nan mester a duna pa por haya luz berde di nan directiva di scol SKOA y tambe pa por a haya sponsorship cerca e compania Setar.

Aña escolar 2014-2015 a cuminsa cu e uzo di iPad den tur dos 4de klas. Tur e alumnonan y e maestronan di e klasnan aki tin un iPad y den klas tin beamer, Apple TV y coneccion di internet pa asina tur mucha por haya les digital.

E aña escolar aki e proyecto a drenta den tur dos 5de klas tambe. Por ripara cu e proyecto escolar aki ta yuda mehora e resultadonan di e alumnonan y di scol. E alumno ta bin scol cu smaak, ausentismo ta hopi abou, motivacion y concentracion ta halto, tin bon comportacion den klas y tur mucha ta cumpli cu tarea di cas.

Tur e alumnonan di klas 4 a bay over.


3D Hand Project

Juffrouw Andrea van Hoof di Colegio Frère Bonifacius tin un alumno den su klas cu mester a amputa su man despues di un accidente. Pa casualidad ela wak e website “Enabling the Future”, un network di boluntario cu ta yuda rond mundo pa medio di 3D-printing. Ela pensa cu un man 3D por ta un solucion pa su alumno y el a cuminsa busca yudansa mas cerca di cas dor di pone un post riba e Facebook page “Durf te vragen Aruba”.

Meneer Pieter Verduijn, maestro di techniek na International School of Aruba a reacciona y asina e bala a cuminsa lora. Meneer Verduijn a haya tur cooperacion di su cabesante, sr. Willeford y a cuminsa un proyecto pa traha un man cu un 3D-printer.

Alumnonan di 9th grade y algun di 10th grade na ISA a traha riba esaki hunto cu nan meneer Verduijn. Recientemente e alumno a haya no un, pero dos man 3D.

Cu e proyecto escolar aki e alumnonan no solamente a siña yuda y ta un ehempel positivo pa otro hoben. Nan a siña tambe pa pone teoria den practica, siña investiga, planea, pensa creativo y recicla, budgettering, traha hunto y carga responsabilidad.


Proyecto di Conscientisacion Cochleair Implantaat

Scol Scucha Nos ta un scol pa muchanan cu deficiencia auditivo. Desde mas o menos tres aña pasa e prome muchanan sordo na Aruba a cuminsa haya nan Cochleair Implantaat (C.I.), un aparato special cu ta wordo implanta via un operacion y cu ta yuda cu e muchanan cu ta sordo pa por scucha.

Esaki a pone cu mester a trece cambio den manera di duna les di seña. Awor cu e muchanan por tende mester cuminsa siña nan papia. A bin resulta cu di un manera of otro e uzo y cuido di e C.I. no tabata optimal loke ta stroba e alumno den su desaroyo. Pa e motibo aki a bin cu e proyecto pa conscientisa mayor y yiu riba e importancia di e uzo y cuido di C.I.

Lo duna informacion na mayor y yiu, organisa intercambio entre mayor caminda por conseha otro, comparti experencia, encurasha otro y yuda un mayor cu bin nobo den e proceso.

E team completo di Scol Scucha Nos ta envolvi y ta haya sosten di FEPO y di KNO arts.

Scroll To Top
  • © 2011-2019 Department of Education Aruba (DEA)
  • T +297-528-3400
  • F +297-528-3434
  • info@ea.aw