Acuerdo cu Niagara College Canada

February 16, 2017

Recientemente Minister di Enseñansa Michelle Hooyboer-Winklaar a firma un acuerdo cu Niagara College di Canada. Representante di e scol como tambe di e Embahada di Canada encarga cu Aruba y Corsou tabata presente na e ocasion aki.

Esaki ta e 8 acuerdo cu e Ministerio di Enseñansa ta logra formalisa cu un scol di estudio superior: 4 na Merca y 4 na Canada.

Nos tin un anuncio hopi importante pa un otro acuerdo riba enseñansa superior. Loke cu nos ta yamando awor e di ocho acuerdo similar cu ta duna nos studiantenan diferente beneficionan, entre otro, e parti financiero pero tambe otro oportunidadnan cu nos ta brinda nos studiantenan. Den e caso aki specificamente pa studia na Canada.” asina e mandatario a cuminsa su relato.

Tur esaki a base di nos meta pa habri mas oportunidad posibel pa nos studiantenan a pesar di unda nan lo kier studia y den cualkier ramo cu nan kier studia. Asina aki nos ta kita kisas obstaculonan cu den pasado tabata existi. Entre otro, riba parti financiero pero tambe simplemente informacion hopi biaha cu tabata falta pa studiantenan tuma decision a base di kico nan kier studia y na unda nan kier studia.

Nos ta gradici Embahada di Canada na Caracas, Venezuela cu a haci esaki posibel como tambe e diferente deliberacionnan cu instancianan y cu otro scolnan cu a yuda nos yega na nos acuerdonan. Nos ta hopi entusiasma pa por brinda e oportunidad aki na studiantenan cu ta interesa den e opcion aki” minister Hooyboer-Winklaar a remarca.

E minister a gradici e Embahada Canades y e representante di Niagara College pa nan rol na yega na e acuerdo importante aki na beneficio di studiantenan di Aruba.

 

Director International Office Niagara College

Director International Office di Niagara College, Sean Coote a expresa cu e ta un gran placer cu nan ta aki awe trahando cu e Ministerio di Enseñansa di Aruba pa por formalisa un acuerdo. Niagara a yama hopi studiante di Aruba bonbini durante e añanan y door di formalisa un acuerdo nos ta sinti cu e lo yuda habri porta pa hopi mas hoben studiante di Aruba haya e oportunidad di bay studia na Canada. Mas importante ainda yuda conecta nos dos sistemanan di educacion pa asina por amplia e oportunidadnan pa studiantenan como tambe e colaboracion entre nos institucionnan educacional na Canada y Aruba.” el a bisa.

Niagara College tin un historia largo. Nos ta cumpli 150 aña y ta ofrece mas di 100 diferente tipo di programa diversifica y diferente disciplina Sean a amplia. E la sigui bisa cu lo cera conoci cu algun di e graduadonan di Niagara College cu awendia ta haciendo un impacto grandi na Aruba como tambe rond di mundo.

Sean Coote a sigui splica cu Niagara College ta localisa den e region di Niagara cu ta famoso pa Niagara Falls cu ta atrae aproximadamente 14 miyon bishitante pa aña cu ta bay specificamente pa mira e waterval. Asina por mira algun di e similaridadnan cu Aruba y su industria di turismo y Niagara cu su industria di turismo tin cu ta haci e sociedad aki uno grandi como tambe un colaboracion entre gobierno, e ministerio y nos scol cu nan programanan,” e ta remarca.

Awe ta un dia excitante pa e college pero realmente e ta un continuacion. Awor nos ta cuminsa un capitulo nobo den e relacion cu nos tin cu Aruba, su studiantenan y e gobierno di Aruba. Nos ta wak dilanti cu hopi entusiasmo na e proximo añanan pa logra expande e oportunidadnan pa e studiantenan y expande e oportunidadnan di colaboracion entre Niagara College y e Ministerio di Enseñansa di Aruba e director di Niagara College a enfatisa.

 

Alumni

Alumni Arubano, Aleida Hector a cuminsa bisando cu e ta gusta pensa di su mes como un di e promenan cu a bay Niagara College hopi tempo pasa. “Mi ta extremadamente orguyoso y contento cu e acuerdo aki ta tumando luga awe pasobra ami y mi otro coleganan di Niagara College a experiencia un tempo inolvidabel di educacion como tambe a haci hopi amistad. Awor mas studiante di nos isla tin e oportunidad di experiencia loke cu nos a haci tur e añanan aki pa e studiantenan cu scoge Niagara y Canada mi ta contento cu nan tin e opcion habri aki di bay studia afo cu e scol aki“.

Aleida a yega Niagara College via un amiga cu tabata bin di vakantie. “Mi a bay cerca dje na Canada cu vakantie. E a bisa mi pakico no bay Niagara College. Mi a bay wak con e ta y m’a namora di e scol di biaha. Asina mi a cuminsa mi aventura pa yega for di Colegio Arubano cu mi HAVO diploma na Niagara College. Mi a gradua den Recreational Leisure Service y tambe Special Event Management y asina mas studiantenan di Aruba a yega y nos a haya otro tambe na e scol” Hector a conta.

 

Embahada di Canada

Senior Trade Commissioner di Embahada di Canada na Caracas, Venezuela, responsabel pa Aruba y Corsou, esta Ada Luiz Rodriguez a gradici gobierno di Aruba, specialmente Minister di Enseñansa Michelle Hooyboer-Winklaar pa su generosidad y hospitalidad. Mi ta complaci di por bisa na nomber di gobierno di Canada di ta akinan sosteniendo un di nos gran institucionnan educacional, Niagara College. Mi ta contento di mira cu nos sociedad cu gobierno di Aruba ta creciendo y ta mira dilanti pa mas studiantenan di Aruba lo scoge Canada y asina intercambiando experiencianan di cultura.

[Mas informacion di e acuerdo cu Niagara College Canada]

 

Website

Website: [niagaracollege.ca]

 


Info / Contact

Pa mas informacion por busca den e alfabet menu riba homepage: [S] Studia na Canada of por tuma contacto cu DEA > afdeling Studiefaciliteiten.

Henter comunidad: alumno, studiante, mayor, coleganan maestro y/of cabesante di scol, ta bonbini pa nomina un persona of proyecto escolar pa Appel di Oro 2015. Pa haci esaki mester download e formulario di aplicacion for di riba e website Enseñansa Aruba | ea.aw. Lesa e preguntanan y describi en corto y mas concreto posibel pakico bo kier nomina e persona of proyecto.
Scroll To Top
  • © 2011-2019 Department of Education Aruba (DEA)
  • T +297-528-3400
  • F +297-528-3434
  • info@ea.aw