Vierlandenoverleg cu proyectonan concreto
Minister di Enseñansa di Aruba, Endy Croes, ta mira atras riba dos dia fructifero di reunionnan intensivo y cu resultado concreto durante e ‘Vierlanden overleg’ di Ministernan di Enseñansa, Ciencia y Cultura di Reino.
Strategic Education Alliance (SEA)
E proyecto SEA (Strategic Education Alliance) a haya forma y su logronan den menos di un aña ta notabel na momento cu tres (3) studiante, esta dos (2) di Curaçao y un (1) di Aruba ta na Hulanda actualmente haciendo uzo di e Koninkrijksbeurs di 500 mil euro, cual Hulanda a pone disponibel pa aña pa e proyecto aki. Pues por mira cu un decision tuma na januari 2023 ya caba ta dunando su frutonan.
Mas informacion:
Proyecto Kibrahacha
Kibrahacha ta un proyecto di “Samen Opleiden & Professionaliseren” di docentenan di e islanan ABC. Un punto di preocupacion constante ta e formacion y preparacion di e docentenan califica entre islanan di Reino Hulandes. Tin un “samenswerkingsprotocol” firma pa stimula formacion di e docentenan entre islanan di Reino Hulandes den Caribe.
Mas informacion:
Docentenan cu ta sigui e programa aki
Desde 2021 e studiantenan cu ta studia pa Maestro di Enseñansa Primario ta ricibiendo formacion via e sistema aki. Un total di 93 studiante y 15 “opleidingsscholen” ta participando. E “partnership” aki ta conduci na mehoracion den comunicacion y afinacion entre e institutonan cu ta prepara docente, directiva di scol y gobierno. Tambe e compromiso entre e islanan pa yega na un vision conhunto riba e tema aki.
Kibrahacha lo continua cu profesionalisacion den tur nivel. Kibrahacha por ehempel awo ta haciendo un investigacion profundo riba “human capital” pa por bin cu un “human capital planning” pa e islanan di Aruba, Boneiro y Corsou. Pues ki tipo di maestro e islanan ABC ta bay tin mester, ki tempo y den ki area pa asina por traha planifica, enfoca y dirigi pa futuro. Esaki ta den su fase final y pronto lo bay tin un rapport cu e contenido di e resultadonan.
Durante e “Vierlandenoverleg”, e cuater (4) ministernan a bay di acuerdo pa prolonga e “samenwerkingsprotocol” riba e tema aki, cual inicialmente lo a finalisa na aña 2025. Tur minister a bay di acuerdo cu mester prolonga esaki pa continuacion di e proyecto Kibrahacha. Alabes, e ministernan ta reconoce e importancia di e competencia- y habilidadnan di siglo 21 y a haci apelacion na e team pa prepara nos futuro maestronan cu e afinidadnan necesario di competencianan di siglo 21. Den e “Slotconclusies” e partinan aki a wordo ancra y firma pa e Ministernan di Enseñansa di Reino Hulandes. Asina por mira atras riba un otro logro y compromiso importante entre cuater (4) Ministernan di Enseñansa di Reino Hulandes durante e 4 Landenoverleg.
Educacion Cultural
A keda acorda cu trabounan lo sigui den cada Pais pa institui un Comision Nacional cu lo ta encarga pa lidera e trabounan necesario pa na scol y den comunidad por tin programa di educacion cu ta dirigi pa educa riba e cultura di cada Pais. A encarga e grupo di trabou pa fiha e puntonan di salida comun pa arte y cultura teniendo cuenta cu e contexto local den cada Pais. Tambe a pidi e grupo di trabou pa haci un inventarisacion di tur locual ta e actividadnan cu tin riba e tereno di arte y cultura den Reino Hulandes y pa esaki ta disponibel pa e proximo ‘Vierlandenoverleg.’ A pidi e grupo tambe pa traha un presupuesto pa e plan di accion cu ta necesario pa por haci educacion cultural posibel den e Paisnan den Reino Hulandes.
Fuente
Slotconclusies
Aki por lesa e “Slotconclusies Onderwijs, Cultuur en Wetenschap” firma dia 6 di november ultimo:
Info
Pa mas informacion por busca den e alfabet menu riba nos pagina principal:
