UA: FEF su programa a alcansa e standard internacional di acreditacion den e evaluacion positivo di NVAO te cu 2032
E Facultad di Contabilidad, Finansa y Mercadeo (Faculty of Accounting and Marketing-FEF) di Universidad di Aruba orguyosamente ta anuncia cu riba 28 di januari 2026 e programanan bachelor Finance y Control y Marketing Management a ricibi un evaluacion positivo di Nederlandse-Vlaamse-Accreditatieorganisatie (NVAO).
E resultado aki ta confirma cu tur dos programa ta alcansa e standardnan di calidad reconoci internacionalmente, alinea cu esunnan aplica na Hulanda y Vlaanderen. E acreditacion aki ta valido te januari 2032.
Apesar di cu e WHW (Wet op Hoger Onderwijs en Wetenschappelijk Onderzoek ) Ley di Enseñansa Avansa y investigacion cientifico no ta aplicabel na Aruba, e evaluacion a tuma luga completamente segun e marco di acreditacion. Esaki ta nifica cu e programanan a wordo evalua segun e mesun standardnan di garantia academico y di calidad riguroso cu programanan acredita di Hulanda. Como tal, e evaluacion positivo ta substancialmente ekivalente na acreditacion.
Como parti di e proceso di evaluacion, panelnan independiente di experto internacional a haci bishitanan di profundisacion na Universidad di Aruba na september y october 2025. E programanan a wordo evalua segun diferente norma clave, incuyendo e resultadonan di siñamento previsto, ambiente di siñamento, evaluacion y garantia.
E panelnan a conclui cu tur dos programa ta alcansa tur e normanan, confirmando e forsa, coherencia y efectividad di e diseño educativo y su resultado.
E evaluacion a wordo haci door di panelnan distingui di experto di e ambito academico y profecional den region y Europa.
Panel di Maneho di Mercadeo:
- Prof. dr. Ruud Frambach (presidente), Profesor di Mercadeo, Vrije Universiteit Amsterdam
- dr. Anna de Visser Amundson, Profesor (Lector), Hotelschool The Hague
- Jill-Joy Landburg BA, Director Creative Communications & Marketing N.V., Suriname
- Marco Domacassé (studiante miembro), University of Curaçao
Panel di Finansa y Control
- drs. Dirk van der Bij RA RB (presidente), Accountant y asesor registra
- drs. Eveline Kapteijn-Kruijswijk, Profesor-investigado, The Hague University of Applied Sciences
- drs. Steven Debipersad MSc, Anton de Kom University of Suriname
- Chandler Martis (studiante miembro), University of Curaçao
Sosten (ambos panel):
- Anne Martens MA. (Secretaria)
- Reina Louw MA. Oficial di maneho y coordinador di proceso di NVAO
E evaluacion positivo aki ta demostra cu e programanan ta robusto, bon structura, y alinea cu e referencianan internacional, proveyendo studiantenan cu experencia educativo di calidad halto.
Pa studiante- y interesadonan, e resultado aki ta ofrece siguransa cla cu e programanan ta cumpli cu normanan academico internacional, cu e titulonan ta confiabel y ta cumpli cu e standardnan internacional, y cu e graduadonan ta bon prepara pa mas estudio avansa y e tereno profesional.
Mientras cu e panelnan tambe a duna recomendacion pa mehoracion, manera ta standard den cualkier revision di calidad riguroso, e facultad a tuma esakinan na cuenta caba y ta implementa e mehoracionnan como parti di su acercamento di mehoracion continuo di calidad.
E logro aki ta refleha e colaboracion y dedicacion fuerte cu tin den henter e facultad, e forsa laboral local y e comunidad universitario.
Un danki special na e representantenan di e companianan local; Setar, Ernst & Young, Ritz Carlton, Marriott Resort, Pelican Adventures, CMB Mercantile Bank, Horacio Oduber Hospital pa nan sosten como parti di e comision di forsa laboral local. Esaki ta un ehempel cla di kico por wordo logra pa medio di trabou den team y un compromiso comparti pa calidad den enseñansa superior.
Universidad di Aruba ta keda comprometi pa sigui fortalece su programanan y mantene e standardnan educativo di mas halto.
Bo tabata sa cu bo por haya un Arubalening pa studia na UA?