Training “Leefstijl” pa Maestro di Deporte
“Leefstijl” ta un programa educativo pa stimula y guia muchanan di edad hoben riba tereno social emocional, con pa haci escogencianan saludabel riba tereno fisico, nutricional y mental.
Recientemente Minister di Enseñansa y Deporte (Sr. Endy Croes) conhuntamente cu colega Minister di Turismo y Salud Publico (Sr. Dangui Oduber), directivanan di scol, representantenan di Plataforma Scol Saludabel, maestronan di Movecion y Salud, IPA, DVG y Departamento di Asunto Social a lansa un training pa e maestronan titula “Leefstijl”.
E training ta wordo duna pa un profesional Hulandes cu a bin Aruba specialmente pa esaki. E trainingnan lo tuma luga di diamars pa diabierna na Surfside Marina y nan ta wordo haci den cuadro di Aruba su Plan Nacional di Prevencion di malesanan no transmisibel.
“Leefstijl” ta un programa educativo cu ta stimula y guia nos muchanan di un edad hoben riba tereno social emocional con pa haci escogencianan saludabel riba tereno fisico, nutritional y mental.
E meta di e programa aki ta pa empodera e muchanan pa ta resiliente y pa ta consciente di e ambiente cu tin rond di nan. E meta ta cu e programa aki lo ta uno structural den scolnan como un vak y lo ta uno duradero. E programa aki lo yuda transforma nos muchanan y tambe e futuro generacion. Pa nan reconoce e importancia den cambia nan estilo di bida, pa hiba un bida mas saludabel. Pa consumi menos sucu y salo, pa participa activamente na actividadnan fisico manera por ehempel un deporte.
Minister Croes a indica cu metodo aki a wordo introduci na mas di 100 pais rond mundo y ta kere cu ta e momento pa duna sosten na e proyecto aki hunto cu Scol Saludabel Aruba.
Ambos minister ta desea exito na tur maestro cu ta participando den e training aki.
