Search Facebook Instagram Twitter

Summer School 2016

June 26, 2016

Minister di Enseñansa Michelle Hooyboer-Winklaar ta informa cu e siguiente “Summer School” lo tuma luga entre 2 y 12 di augustus 2016 na Colegio San Nicolas.

Minister Hooyboer-Winklaar tin un compromiso cu nos hobennnan y kier crea y explora tur posibilidad pa sigui amplia loke ta ofrece na guia y sosten na alumnonan pa asina hisa nan chens pa ta exitoso den nan carera di estudio. Hustamente pa e meta aki a crea e posibilidad e ultimo dos añanan pa ofrece e programa di Summer School pa tur alumno di MAVO cu ta bay drenta HAVO. Studiantenan cu a participa den e programa aki den pasado a duna feedback sumamente positivo, y a constanta cu e guia ricibi durante e 2 siman nan aki a haci un diferencia pa cu nan preparacion pa HAVO.

E Summer School lo tuma luga di diamars 2 di augustus pa diabierna 12 di augustus 2016. E orario tur dia lo ta di 8:00 di mainta pa 12:30 or di merdia (uiterlijk).

E Summer School tin un capacidad maximo pa 60 alumno y ta habri pa tur alumno cu ta bay haci e transicion di MAVO pa HAVO 4 sea na Colegio San Nicolas of Colegio Arubano.

Tur alumno mester aplica via email csnschooladm@gmail.com cu un specificacion di nomber completo, fecha di nacemento, vakkenpakket y number di telefoon. E deadline pa inscripcion ta diabierna 22 di juli 2016.

Durante di e Summer School lo ofrece preparacion riba e siguiente vaknan: Nederlands, Engels, Wiskunde A, Wiskunde B, Economie / Management & Organisatie, Natuurkunde /Scheikunde.

E intencion ta pa e aña aki tambe amplia e programa cu un parti cu lo concentra riba studievaardigheden.

E Summer School manera tur aña, ta completamente gratis y ta pidi tur alumno pa aplica lo mas pronto cu ta posibel.

E Summer School ta un programa di preparacion como servicio na e hobennan. Minister Hooyboer-Winklaar ta pone enfasis cu e ta un servicio na e hobennan pero kier garantisa participacion di e alumnonan y kier pa mas alumno posibel haci uzo di e oportunidad aki. E intencion ta pa den un setting mas chikito laga e alumnonan cuminsa familiarisa entre otro cu e materianan, e metodonan, e nivel, manera di duna les y ambiente di e school. Esaki lo mester facilita e transicion entre MAVO y HAVO. No ta pretende cu esaki lo soluciona tur problema pero si cu e hobennan lo ta miho prepara compara cu e situacion den pasado unda cu no ta ofrece nada na preparacion prome cu e hobennan drenta HAVO.

E Summer School ta un parti di e pakete di guia y sosten cu Minister di Enseñansa ta haci posibel pa e alumnonan di MAVO cu ta bay HAVO. Minister Hooyboer-Winklaar ta convenci cu e diferente iniciativanan ta complementa otro y ta mira caba e frutonan di e inversionnan aki pa cu e mehoracion di e conexion entre MAVO cu HAVO.

Minister Hooyboer-Winklaar kier motiva tur e alumnonan di MAVO cu a scoge pa HAVO sea na Colegio San Nicolas of Colegio Arubano Oranjestad pa saca lo maximo di e oportunidadnan cu ta wordo ofreci y ta desea tur alumno hopi exito.

 


Info / Contact

Pa mas informacion por busca den e alfabet menu riba homepage: [E] Enseñansa Secundario of por tuma contacto cu  [M] Ministerio di Enseñansa.

Scroll To Top
  • © 2011-2023 Department of Education Aruba (DEA)
  • T +297-528-3400
  • F +297-528-3434
  • info@ea.aw

By orbitalnets