Studiante Arubiano a presenta su buki “Living rich as a student in the Netherlands”

November 16, 2020

Den Haag – Recientemente e studiante Arubiano Franklin Seute tabata di bishita na Arubahuis pa haci entrega oficial di su buki “Living rich as a student in the Netherlands: from broke to a frugal lifestyle”.

Potret ta cortesia di Cas di Aruba

E occacion special aki a conta cu presencia di Minister Plenipotenciario sr. Guillfred Besaril como tambe cu presencia di Minister President Evelyn Wever-Croes cu tabata na Hulanda pa un bishita di trabou.

Franklin Seute a bin studia na Hulanda na aña 2015 y actualmente e ta den su ultimo aña di e opleiding Mechatronica na Avans Hogeschool. E buki aki ta enfoca riba e topico di finansas personal como studiante y ta promove un estilo di bida mas conciente y eficiente. Franklin a wordo inspira pa scirbi y publica e buki aki a base di su propio experencia como studiante. Su motivacion principal ta pa informa y concientisa studiantenan internacional mas mihor riba e topico di finansas personal y riba e importancia di spaar y riba maneranan con por scapa placa. Den su buki Franklin ta duna informacion relevante riba entre otro e entradanan di un studiante, gastonan mensual y tambe ta duna varios ehempel y tools cu studiantenan por aplica den nan mesun situacion.

E buki ta dirigi su mes riba studiantenan internacional na Hulanda. Esaki kiermen cu e ley y reglanan na Hulanda por diferencia hopi pa studiantenan internacional depende di unda bo ta bin. Pesey mes e escritor y Arubahuis ta conseha studiantenan di Aruba pa tuma nota di e informacion di e buki pero pa semper verifica hopi bon kico ta aplica pabo como studiante di Aruba. Vooral pa evita cu bo ta wordo confronta cu boet y problemanan administrativo cu instancianan na Hulanda. Esaki ta entre otro valido pa e parti di seguro medico, zorgtoeslag, studiefinanciering y tambe demas aspectonan di belasting na Hulanda.

Durante e encuentro na Arubahuis a repasa e contenido di e buki y a intercambia riba diferente aspecto. Hunto lo sigui delibera riba e posibilidad pa brinda e contenido na nos (futuro) studiantenan den forma di workshops y tambe pa haci e buki y e informacion lo mas accesibel posibel via di schoolnan y tambe via Biblioteca Nacional. Tambe a palabra cu Arubahuis lo duna su input unda cu ta necesario pa e publicacion di e di dos edicion di e buki unda cu lo elabora mas riba e parti di seguro di studiantenan internacional y e aspectonan specifico di e situacion na Hulanda pa nos studiantenan for di Aruba.

Ambos Minister President como Minister Besaril a felicita e studiante cu e publicacion di su buki y a mustra elogio y aprecio pa e esfuerso y pa e logro aki. Ambos mandadatario a indica cu e ta hopi admirabel con un studiante ta haci e sacrificio pa publica un buki pa yuda informa y conseha demas studiantenan internacional riba un topico asina importante. Arubahuis ta felicita studiante Franklin Seute un biaha mas cu e publicacion di su buki y nos ta spera cu e buki por sirbi como inspiracion y motivacion pa demas studiantenan riba e tereno di nan finansas personal.

Pa mas informacion por bishita e pagina “Studia na Hulanda” di Arubahuis conhuntamente cu Departamento di Enseñansa na e seccion di “overige informatiebronnen”: