Studentenhuisvesting Utrecht
November 30, 2023
Arubahuis ta brinda informacion di studentenhuisvesting na Utrecht pa futuro studiantenan for di Aruba.
Studentenhuisvesting Provincie Utrecht
• Provincie Utrecht: Utrecht, Houten, Zeist, de Bilt, Nieuwegein, Ijsselstein, Maarssen, Amersfoort
Mentor di region di Utrecht sra. Reina Danje kier informa tur studiante cu tin pensa di bay studia na Utrecht cu haya un camber na Utrecht ta un reto grandi. Motibo pa esaki ta cu tin scarsedad grandi na camber pa studiante y tin interes grandi bou di studiante pa studia na e ciudad aki.
Pa cuminsa e studiantenan mester busca camber na tempo. Preferibel asina cu nan cuminsa den “voorexamenklas”. Arubahuis hunto cu e mentornan tin e tarea pa duna e informacion y conseho necesario tocante con por yega na vivienda y ta enfatisa cu e studiante mes ta keda responsabel pa haya y regla su vivienda na Hulanda.
Studiantenan por haci uzo di diferente manera pa yega na un camber na Utrecht.
Woningcorporatie SSHXL
Woningcorporatie SSHXL
Esaki ta un organisacion di maneho di camber pa studiante (woningcorporatie) Stichting Studenten Huisvesting XL of abrevia SSHXL:
Por inscribi via di SSHXL desde 16 aña di edad. Unabes bo inscribi na e website di SSHXL bo inscripcion ta valido pa e ciudnan Utrecht, Rotterdam, Amersfoort, Zwolle y Tilburg. Despues di inscribi bo mes y paga un suma di inscripcion, bo por cuminsa reacciona riba camber cu ta wordo ofreci.
E reto pa haya camber via SSHXL na Utrecht ta cu e studiante mester “hospiteer”. Esey kiermen cu bo ta wordo invita pa bin wak bo camber y cera conoci cu e otro habitantenan y cu nan ta dicidi si bo ta haya e camber si of no. Ademas bo mester ta inscribi por lo menos 2 aña prome cu bo wordo invita.
Acomodacion temporal via Universiteit Utrecht (UU)
Acomodacion temporal via Universiteit Utrecht (UU)
Na Utrecht tin un opcion limita pa haya acomodacion temporal via scol pa e grupo di studiante cu ta scoge pa Universiteit Utrecht (UU). Esaki ta conta solamente pa studiantenan cu scoge pa un bachelor of masteropleiding na Ingles. Ta trata di un acomodacion “short-stay” pa maximo un (1) aña. Lastimamente e areglo aki no ta conta pa studiantenan cu ta scoge un estudio regular na Hulandes.
Universidad Utrecht ta enfatisa cu aunke studiantenan for di Aruba cu scoge un opleiding na Ingles ta cualifica awo pa bin na remarca pa e areglo, e Universidad no por garantisa acomodacion pa tur studiante mirando cu e cantidad ta limita.
Inscribi na tempo ta keda crucial. Riba e siguiente link di UU por haya informacion riba e opcion di vivienda temporal via di UU y tambe por haya mas informacion di otro opcionnan y tips hopi valioso riba e topico di vivienda:
Acomodacion temporal via Hogeschool Utrecht (HU)
Acomodacion temporal via Hogeschool Utrecht (HU)
Acomodacion via Hogeschool Utrecht tambe ta un posibilidad. Ta bon pa menciona cu e posibilidad aki ta depende di e instituto educativo cu e studiante lo bay atende. E disponibilidad ta limita pero e ta bale la pena pa purba. Studiantenan por acerca e instancia tambe pa conseho. Aki tambe ta trata di un acomodacion “short-stay” pa maximo un aña via Hogeschool Utrecht. Riba e siguiente links di HU por haya mas informacion di e opcion aki:
Makelaar of bemiddelingsbureaus
Makelaar of bemiddelingsbureaus
Un otro opcion ta via makelaar of bemiddelingsbureaus. Esakinan ta opcionnan normalmente mas caro:
Bo mester paga e makelaar pa su trabou y un borg cu ta wordo stipula entre 1 pa 3 luna extra di huur. Ta bon pa menciona cu hopi biaha un persona mayor di edad y preferiblemente recidencia na Hulanda lo mester para garantia pa e pago di huur. Lastimamente por constata riba e mercado comercial aki cu estafa ta tuma lugar, pesey mester ta hopi alerta y busca referencia y conseho. Arubahuis tin contacto y experencia cu algun makelaar y bemiddelingsbureau pero no por para responsabel pa e servicio y condicionnan.
Particuliere aanbieders
Particuliere aanbieders
Tambe tin habitante di Utrecht cu ta ofrece camber como personanan priva (particuliere aanbieders). Hopi di e cambernan aki por wordo haya via websites:
Mayoria di biaha bo mester paga un suma (cu un creditcard, prepaid creditcard of un debitcard Hulandes) pa bo por subi un de e websitenan aki y asina reacciona riba e cambernan cu ta wordo ofreci. Tambe via Facebook tin posibilidad manera riba e pagina “Zoekt kamer in Utrecht” y “Kamer in Utrecht” na unda bo por logra haya camber. Aunke esaki sigur ta opcionnan real pa varios studiante regla vivienda, e tin su risico mirando cu esaki no ta wordo regula, controla y e prijsnan por ta hopi halto.
Arubahuis ta conseha tur futuro studiante pa ta cauteloso y alerta pa señalnan di posibel estafa y ta conseha pa pidi conseho y referencia prome cu haci cualkier transaccion financiero.
Landelijke Studentenvakbod
Landelijke Studentenvakbod (LSVB) ta suministra informacion y conseho necesario na studiantenan tocante con pa yega na vivienda den nan region di studio. Via e siguiente link studiantenan por haya e informacion di LSVB:
Vecindario di Utrecht
Por ultimo ta importante pa menciona cu tin biaha ta mas facil pa haya camber den vecindario di Utrecht, por ehempel na Houten, Zeist, De Bilt, Nieuwegein, IJsselstein, Maarssen y Amersfoort, na unda cu acceso na transporte publico lo yudabo ta den Utrecht den corto tempo.
Sra. Danje un biaha mas ta enfatisa cu si bo tin pensa di bay studia na Utrecht inscribi bo mes na tempo (inscripcion bou di 1 aña ta laat caba!) y keda controla bo inscripcion regularmente.
Contact Mentor
Pa mas informacion of pa cualkier pregunta relaciona cu Provincie Utrecht por tuma contacto cu:
Mentor Reina Danje
Telefon: +31 (0)6 8476 3693
Email: r.danje-mentor@arubahuis.nl
Info / Contact
Pa mas informacion por busca den e alfabet menu:
Por tuma contacto cu:
Scroll To Top
