Stichting Tooby cu regalo pa scolnan Primario

December 11, 2017

Recientemente Stichting Tooby a ofrece scolnan primario na Aruba un CD titula “Tooby y e porkeria den mondi”, un pelicula anima cu ta siña e muchanan con pa anda cu naturalesa.

Anteriormente e proyecto a wordo entrega na e scolnan basico di Corsou, caminda gran parti di e pelicula anima a wordo traha.

Debi na e exito, Stichting Tooby a dicidi cu muchanan di Aruba y Boneiro tambe mester haya e oportunidad pa forma parti di e proyecto aki.

E pelicula anima ta bay tocante e macaco Tooby y su amigonan, un flamingo y un olifante, cu un dia ta haya un holo straño den mondi. Nan ta bay investiga y ta bin discubri cu un djaka maligno y su ehercito di cacalacanan ta trahando un sero di sushi enorme y cu nan tin plan pa core cu tur bestia for di mondi. Tooby ta dicidi cu mester stop e djaka, pero no por logra esey asina facil.

E meta di e proyecto ta pa den forma di wega e muchanan cera conoci cu e peligernan di contaminacion y e importancia di un medio ambiente limpi.

“Ni e comunidad, ni esnan cu ta bishita nos no kier biba memey di desperdicio. Pues ta hopi importante pa for di un edad hoben siña e muchanan con pa anda cu naturalesa na un manera responsabel. Un pelicula ta un manera perfecto pa den forma di wega conscientisa e muchanan di medio ambiente. Semper mi tabatin un pasion pa pelicula anima pero tambe pa medio ambiente. Mi ta hopi agradecido cu mi por combina e dos cosnan aki” e productor Willemijn Jussen a conta.

Jussen a nace y crece na Corsou. “Naturalesa ta importante tur caminda y mas ainda na lugarnan manera Aruba, caminda turismo ta e pilar economico principal” el a agrega.

E pelicula di 30 minuut ta produci den un version Hulandes y un version Papiamento y ta inclui diferente cantica cu e muchanan por canta. E canticanan ta interpreta pa e conocido artistanan di Corsou Izaline Calister y Danny Janga, conoci di e musical “the Lion King”.

Departamento di Enseñansa Aruba (DEA) a ricibi e material for di Bas Jussen, escritor y co-pintor di e pelicula anima, y lo percura pa reparti esaki entre e scolnan preparatorio (kleuter) y basico na Aruba.

“Nos ta sumamente contento cu e sosten di Departamento di Enseñansa, como tambe di KLM y Rotary Club” Jussen a comparti cu hopi entusiasmo. “Danki na nan aporte e material a yega Aruba y por wordo ofreci den forma gratuito na e scolnan” Jussen a bisa.

Banda di e CD por haya mas informacion y idea pa les riba e websites [jusstpublish.nl] y [tooby.nl] y facebook page [facebook.com/ToobyBanana].