Situacion preocupante di vivienda pa studiante na Hulanda
Den Haag – Arubahuis na tur studiante: “Si bo no tin un camber of adres fiho, pospone bo binimento pa Hulanda cu un aña”.
E potret ta cortesia di Cas di Aruba
Situacion preocupante
Arubahuis ta den pleno preparacion pa e binimento di e grupo di studiante na luna di augustus binidero. Den cuadro di esaki Arubahuis a ricibi diferente signal for di e mentornan cu hopi studiante cu ta biniendo Hulanda te ainda NO tin camber of vivienda regla. Tambe cu un cantidad grandi di studiante no a inscribi na tempo pa un vivienda.
E situacion aki ta preocupante pa Arubahuis y e mentornan. Dicon? Pasobra semper Arubahuis a bisa cu e question di busca camber ta keda un responsabilidad di e studiante y di nan mayornan. “Nos como Arubahuis y e mentornan semper a purba na informa e studiantenan mas amplio posibel riba e tema aki. Ta bou situacionnan sumamente extraordinario Arubahuis por haci un apelacion na e Hogeschool, Universidad y cooperacion di vivienda pa intermedia. Pero Arubahuis mes no por regla of garantisa vivienda,” asina directora a.i. di Arubahuis drs. Glenda Hernandez a bisa.
Segun sra. Hernandez semper Arubahuis a enfatisa e importancia pa tempran cuminsa orienta riba vivienda como studiante, mirando e scarsedad na camber of vivienda pa studiante den diferente region na Hulanda. Ta pesey riba e website di Departamento di Enseñansa tin un pagina totalmente dedica na e tema aki.
Cantidad di camber ta sumamente scars
Sra Hernandez: “Pa logra haya un camber of cas na e momentonan aki ta sumamente dificil, mirando cu e guera na Oekraina a ocasiona un fluho grandi di refugiado cu tambe mester un dak riba nan cabes. Hopi gemeente ta duna preferencia na refugiadonan for di Oekraina. Tambe gemeentenan ta controla severo riba huurmento di camber sin permiso. Y no ta tur doño di cas ta haya permiso pa huur un camber cu studiante, cu e consecuencia cu e cantidad di camber ta sumamente scars.’
Arubahuis lo informa tur studiante cu ta biniendo Hulanda pa medio di un carta riba e situacion precario cu camber pa e motibo cu sin un adres fiho na Hulanda e studiante NO por inscribi su mes na un gemeente; no por haya un BSN (Burger Service Nummer) y sin e BSN e studiante no por habri un cuenta di banco y regla otro asuntonan pa cu su estudio.
Conseho urgente
Segun señora Hernandez esaki lo por nifica un mal comienso di nan temporada di estudio cu lo trece hopi stress cune. “Si tene na cuenta e puntonan menciona, nos conseho urgente ta pa anula bo binimento na Hulanda te ora cu bo tin perspectiva riba un adres fiho. Bin Hulanda sin un camber of adres fiho ta un gran risico pa bo mes y pa otronan. Si bo chens riba un camber e aña aki ta chikito, Arubahuis ta conseha pa haci tur e areglonan posibel pa otro aña bo por bin mihor prepara Hulanda.
Pa e studiantenan cu ta pensando pa bin Hulanda na 2023, un suplica grandi ta pa cuminsa inscribi pa un camber of vivienda desde awor!” segun declaracion di director a.i. di Arubahuis Glenda Hernandez.
Por ultimo señora Hernandez a bisa cu na tur momento studiantenan cu tin pregunta por haci esaki na e seccion Onderwijszaken di Arubahuis of na un di e mentornan.
Lesa e carta di Arubahuis aki:
Pagina “Studia na Hulanda”
Pa mas informacion specifico, studiante y mayor por acudi na e pagina special [Studia na Hulanda] cu a wordo desaroya door di Departamento di Enseñansa Aruba hunto cu Arubahuis. E pagina aki ta contene informacion riba tur e topiconan relevante y consehonan importante tocante studia na Hulanda.
Informacion di cada ciudad y regio
Riba e pagina [Studia na Hulanda] e mentornan di Arubahuis a publica informacion specifico di vivienda di cada regio na Hulanda. Cada mentor a inclui e opcionnan mas conoci, pagabel y confiabel cu tin pa vivienda pa studiante den e ciudad/regio. Den e publicacion di cada mentor por haya e links na e diferente websites y tambe splicacion di e procedura, deadlines y den caso cu tin cualkier areglo special pa studiantenan di Caribe of studiantenan cu ta bin di afo.
Info / Contact
Pa mas informacion por busca den e alfabet menu:
Por tuma contacto cu:
Scroll To Top
