Search Facebook Instagram Twitter

Siman di training di Scol Saludabel

November 27, 2019

Scol Saludabel Aruba ta organisando, cu colaboracion di Ministerio di Salud Publico, un siman intensivo di training for di dia 25 te cu dia 29 di november.


Poco poco mas y mas scol preparatorio y basico ta interesa pa bira un Scol Saludabel. E proceso pa bira un Scol Saludabel ta encera entre otro guia di un consehero di Scol Saludabel (Gezonde School Adviseur). Aruba tin actualmente 4 consehero di Scol Saludabel cu a haya training na Hulanda na 2016. Debi na e interes creciente pa bira un Scol Saludabel, e cantidad di consehero di Scol Saludabel lo no ta suficiente.

Pa e motibo aki Scol Saludabel Aruba a scohe pa trece 2 profesional di Hulanda, señora Monique Boonekamp y señora Muriel Weltens, pa asina por train mas consehero di Scol Saludabel. Tur dos profesionalnan aki ta Consehero di Scol Saludabel na Hulanda.

Mirando e oportunidad unico aki a dicidi di inclui e training di coordinador di Scol Saludabel. E coordinador di Scol Saludabel ta miembro di e team di salud di e scol cu ta traha pa e scol por bira un Scol Saludabel. Su tarea ta organisa, sostene y coordina tur loke ta trata Scol Saludabel na su scol.

Dialuna 25 di november mainta a cuminsa cu un presentacion pa minister y director y/of representante di instancianan cu ta directamente envolvi cu Scol Saludabel Aruba.



A conta cu presencia di Minister di Enseñansa, Ciencia y Desaroyo Sostenibel, sr. dr. Armando Lampe y Minister di Asunto Social y Labor, Sr. Glenbert Croes. Ademas tabata presente e director y/of representante di Departamento di Salud Publico, Departamento di Enseñansa, Departamento di Asuntonan Social, Instituto Pedagogico Arubano y Instituto Biba Saludabel y Activo. Representantenan di e schoolbesturen, SKOA, SPCOA y DPS y representante di Dienst Inspectie tambe a asisti na e presentacion.


Info / Contact

Pa mas informacion por busca den e alfabet menu riba homepage: [G] Gezonde School of  [S] Scol Saludabel.

Scroll To Top
  • © 2011-2023 Department of Education Aruba (DEA)
  • T +297-528-3400
  • F +297-528-3434
  • info@ea.aw

By orbitalnets