Seminario di Kerndoelen pa Scol Preparatorio
Recientemente a tuma luga un seminario di Kerndoelen na cual diferente Scol Preparatorio a participa. Durante e seminario a trata e Kerndoelen pa Rekenen y Wiskunde.
 |
E cabesantenan hunto cu e Interne Begeleiders (IB-ers) a ricibi un workshop pa trata e implementacion di e documento aki. A trata specialmente e parti con pa sigui aplica y evalua Kerndoelen di Matematica den practica.
Cabesante di Fontein Kleuterschool, Georgino Vrolijk, a haya cu e seminario ta hopi bon y cada scol ta trahando segun nan situacion. “E ta un momento di evalua individualmente na unda nos ta den e proceso, pero tambe e ta un momento di mira con nos por sigui colabora cu otro pa yega na e final.” Un di e puntonan cu a bin dilanti ta cu tin diferente manera pa yega Roma, kiermen cu hopi di nan ta bay segun nan situacion, segun nan contexto pero cu tur ta dirigi nan mes riba e mesun meta nacional.
Fontein Kleuterschool ta implementando esaki caba y a probecha pa reflexiona con nan ta bezig y tambe scucha di otro scolnan con nan ta haciendo pa asina hunto nan bay dilanti.
Desde luna di October 2016 Fontein Kleuterschool a acopla loke cu nan ta ofrece den nan curriculum y na kico nan falta pa asina nan ta directamente acopla cu e Kerndoelen. “Locual cu nos falta, nos tin cu añadi”, Gino Vrolijk a remarca.
Tambe a atende e aspecto con pa evalua na final di aña e Tussendoelen y Kerndoelen cua ta e aspectonan cu ta bin acerca. Tin 3 componente den e aspecto aki, mas tanto e Kerndoelen, e ofrecemento di e curriculum, e evaluacion of assesment di e desaroyo di e mucha si el a logra alcansa e Kerndoelen. Esey ta e 3 componente basico cu Fontein Kleuterschool ta trahando riba dje.
 |
“Awe tabata un dia tremendo, e tabata hopi interactivo“, cabesante di Preparatorio Tarcisius, Angela Romero-Heredia, a remarca. E ta kere cu hopi hende a haya e oportunidad di comparti nan experiencia y siña for di otro, tambe habri wowo y mira kico nan mester shape up ainda. Cabesante di Preparatorio Tarcisius ta haya importante ainda como kleuter tin e facilidad di compronde con cada scol ta traha y compara esaki tambe. Tin scol ta mas leu cu otro, pero nan tin e mesun dolornan unda cu nan por a complementa otro.
Tin 2 scol cu ta traha cu e meta di desaroyo y ora cu nan a sinta compara den pasado, nan a ripara cu e ta basta cerca di e Kerndoelen, Angela Romero-Heredia a remarca. Nan a sinti un tiki alivio di e banda ey, pasobra nan por acopla facilmente na locual ta poni caba como un standard cu nan mester yega na dje.
Locual tambe a bin pa dilanti ta cu Kerndoelen a trece trankilidad den scol Preparatorio. No tin un liña awor cu ta mihor cu e otro, cada scol ta determina pa nan mes con nan ta yega, importante ta cu tur ta traha den e direccion di nos metanan nacional (Kerndoelen).
Na final di dia e cabesantenan hunto cu nan IB’er a sali satisfecho di e seminario y cu hopi herment pa sigui cu e implementacion di Kerndoelen Rekenen y Wiskunde den nan scol.
 |
Info / Contact
Pa mas informacion por busca den e alfabet menu riba homepage: [E] Enseñansa Primario of [K] Kerndoelen of por tuma contacto cu [M] Ministerio di Enseñansa.
Scroll To Top
