Prome grupo di studiante ta yega Hulanda
Dia 30 di juli e prome grupo di studiante di Aruba a yega Hulanda pa sigi un estudio avansa na nivel di HBO of Universidad.
Un total di 24 studiante cu lo bay studia na e ciudadnan di Tilburg y Eindhoven a yega cu vuelo 765 di KLM. Diaranson 2 di augustus e di dos grupo y tambe esun mas grandi lo bay Hulanda.
Na Schiphol e studiantenan mescos cu tur aña a wordo saluda pa Minister Plenipotenciario mr. Ady Thijsen y director a.i. di Arubahuis drs. Glenda Hernandez. Un biaha mas tabata tin un delegacion consistiendo di funcionarionan di e seccion di Enseñansa di Arubahuis, studiementor y miembronan di e POC (Plaatselijke Opvangcommissie) presente den sala di yegada di Schiphol.
Mester bisa cu e grupo di studiante a sali basta liher cu nan maleta. Akinan na un forma bon coordina y organisa a haya instruccion di personal di Arubahuis, mentor y miembronan di e POC con pa cana y unda nan mester a para den grupo pa warda nan turno pa bay na e bus cu lo hiba nan Tilburg of Eindhoven.
Na Schiphol tabata tin un camaraman di e programa Leu foi Cas pa graba e yegada y haci algun entrevista cu e studiantenan. Roy Kelly di e website Arubiano.eu tambe a saca potret di e studiantenan.
Mayan e grupo di studiantenan aki lo cuminsa cu e programa di “opvang” obligatorio, cual lo dura entre tres dia y un siman. Durante e dianan aki e studiantenan nobo lo haya e guia nesesario den nan ciudad unda pa sigur cuater aña of mas nan lo biba y studia. E prome aña e studiante ta ricibi guia di e studiementor, pero pa e resto di su estudio e ta cay bou di Arubahuis. Riba e Facebook pagina di Arubahuis y Onderwijszaken lo tin potretnan di e yegada di e grupo di studiantenan.
