Search Facebook Instagram Twitter

Prome grupo di studiante a yega Hulanda

August 2, 2020

Den Haag  – E team di Arubahuis, e mentornan y e miembronan di e diferente Plaatselijke Opvang-Commissie (POC) a ricibi nos hobennan cu a bay studia na Hulanda.


Prome grupo di studiante a yega bon Hulanda

Den Haag – Cu vuelo KL771 a yega awe mainta e prome grupo di studiante cu a scoge pa bay sigui un estudio avansa na Hulanda. E grupo a consisti di 27 studiante cu lo bay studia na e ciudadnan Zwolle, Deventer y Enschede. Na Schiphol tabata presente funcionarionan di Onderwijszaken di Arubahuis, e mentor pa e region aki cu ta sra. Lourdes Bramble-Tromp y miembronan di e Plaatselijke Opvangcommissies (POC).



Pa hopi luna Arubahuis a bin ta haci e preparacionnan necesario pa ricibi nos studiantenan cu ta bay Hulanda. E aña aki henter e operacion pa guia e studiantenan mester a cana segun e protocol na Hulanda pa loke ta trata e Coronavirus “COVID-19”. Minister Plenipotenciario Guillfred Besaril ta contento di mira cu Arubahuis a logra na haci un bon trabou riba e tereno aki. “E situacion cu COVID-19 a trece un reto grandi cu ne pa mira con nos por logra haci e trabou aki di tur aña conforme e situacion actual. Hopi procedura cu nos a custumbra cu ne, mester a keda adapta. Esaki ta encera no unicamente e parti logistico, pero tambe e programa di “opvang” den e ciudadnan” asina Minister Plenipotenciario Guillfred Besaril a bisa.



Un punto importante den e maneho di minister Besaril ta pa duna informacion na e studiantenan prome cu nan bay Hulanda pa asina nan ta miho prepara. Esaki tabata sosode durante encuentronan na luna di juni na Aruba, pero e situacion cu COVID-19 a pone cu e aña aki mester a bin cu adaptacion. Minister Besaril: “Arubahuis a tene un serie di webinar pa e grupo di studiante cu ta bayendo Hulanda. Akinan Arubahuis conhuntamente cu otro stakeholders a duna informacion valioso na e studiantenan prome cu nan a subi avion pa Hulanda. Nos preocupacion mayor keto bay ta keda pa e studiantenan ta wordo bon ricibi y haya e guia necesario den nan prome lunanan na Hulanda. Y esey mi por bisa cu Arubahuis semper a sabi di brinda riba e tereno aki un servicio profesional, conhuntamente cu nos team di mentornan y nan POCnan,” asina Minister Plenipotenciario Guillfred Besaril a bisa.

Dialuna 3 di augustus lo yega e di dos grupo cu ta consisti di 90 studiante, mientras cu un dia despues esta diamars 4 di augustus e ultimo grupo lo yega Hulanda. Aki ta trata di 88 studiante.



Potret: cortesia di Cas di Aruba


Info / Contact

Pa mas informacion por busca den e alfabet menu riba nos pagina principal:

Por tuma contacto cu:

Sigui nos via e social media pages:

Scroll To Top
  • © 2011-2023 Department of Education Aruba (DEA)
  • T +297-528-3400
  • F +297-528-3434
  • info@ea.aw

By orbitalnets