Search Facebook Instagram Twitter

Minister Plenipotenciario ta reuni cu mentornan na Hulanda

December 11, 2017

Den Haag – Minister Plenipotenciario Guillfred Besaril durante un reunion na Gabinete di Aruba a cera conoci cu e team di mentornan cu ta guia nos studiantenan na Hulanda.

Potret: Gabinete di Aruba

E mandatario a cuminsa cu un introduccion di su persona, su carera como polis y politico. Despues sr. Besaril a papia entre otro riba e problemanan riba e mercado laboral na Aruba y e demanda di profesionalnan. ‘Na e momento aki un 58 porciento di e forsa laboral na Aruba tin un nivel di educacion di MAVO of menos cu esaki. Un cantidad di entre 13 pa 15 porciento tin un nivel di estudio di HBO y 3 porciento so ta riba un nivel universitario. Mester bin cambio den e situacion aki y pesey mi ta mira un rol hopi importante pa Cas di Aruba pa stimula cu mas profesionalnan caba nan estudio avansa y regresa Aruba.

Un meta grandi cu mi tin poni mi dilanti ta pa bringa pa hisa e porcentahe di studiantenan cu cada aña ta caba nan estudio cu exito. Esey ta un meta cu mi kier logra en cooperacion cu e departamento di Enseñansa di Cas di Aruba y e mentornan,’ asina Minister Plenipotenciario Guillfred Besaril a bisa.

Despues di e introduccion di minister Besaril, e mentornan a presenta nan mes. Algun tin ta haciendo e trabao aki pa hopi aña caba y hopi di nan ta traha den e mundo di enseñansa.

E mandatario a gradici e mentornan pa a comparti cune nan experencia y preocupacion pa e bienestar di nos studiantenan. Sr. Besaril a bisa di a scucha bon loke ta e problemanan y cu esakinan tin su atencion.


Info / Contact

Pa mas informacion por busca den e alfabet menu riba homepage: [S] Studia na Hulanda of por tuma contacto cu: Arubahuis

Scroll To Top
  • © 2011-2023 Department of Education Aruba (DEA)
  • T +297-528-3400
  • F +297-528-3434
  • info@ea.aw

By orbitalnets