Durante e biahe di trabou na Merca, Minister di Enseñansa a haci un bishita oficial na Montgomery College hunto cu Minister Plenipotenciario na Washington D.C. sra. Joselin Croes y directora general di Colegio EPI sra. Ankie Danker.

E motibo di e bishita aki ta pa yega na un acuerdo pa traha den colaboracion cu Colegio EPI, Universidad di Aruba (UA) y Instituto Pedagogico Arubano (IPA).

Durante e bishita, a reuni cu dr. Michael Mills y henter e ekipo di Montgomery College, pa evalua riba ki liña por inicia. Un di e opcionnan ta cu Colegio EPI a cuminsa cu un structura nobo pa e estudio di tres (3) aña di ICT y ta mira con por conecta esey pa sigui cu un Associate degree cu e ayudo di Montgomery College. Dr. Michael Mills a expresa cu nan ta entusiasma pa traha den colaboracion cu Aruba y cu e colaboracion aki no ta beneficia Aruba solamente, pero tambe Montgomery College. Desde algun aña atras caba, Minister Plenipotenciario Joselin Croes a bin ta trahando riba e colaboracion aki pa Aruba.

Durante e bishita oficial tambe a haya un recorido di e campus.

Durante e biahe di trabou na Merca, a haci un bishita oficial na Howard University hunto cu Minister Plenipotenciario Joselin Croes y director general di Colegio EPI Sra. Ankie Danker cu e meta pa crea oportunidad pa nos studiantenan di Aruba.

Actualmente, ta trahando riba un programa pa pronto por firma un acuerdo cu Howard University. Minister Plenipotenciario na Washington D.C., Sra. Joselin Croes a indica cu esaki ta su di tres (3) bishita na Howard University. Un partnership cu Howard University ta hopi importante. Howard University ta forma leader den nan comunidad.

Durante e reunion a trata e siguiente topiconan: pa studiante local continua nan estudio na Howard y “in-state tuition”. Adicionalmente, Howard University kier trece algun studiante Aruba en conexion cu e proyecto di IPA. Tambe a trata un posibel beca pa e atletanan. Ta purba pa crea oportunidad pa e studiantenan di Aruba continua cu nan estudio na Washington DC y pa e studiantenanan di Merca por haci un intercambio di estudio na Aruba.

Sra. Ankie Danker a expresa cu nan a dialoga cu e team di Howard University tocante “samenwerking” cu Colegio EPI y Universidad di Aruba. Pero e enfoke di Colegio EPI ta mas pa e colaboracion entre e docentenan, con por intercambia of con e docentenan di Howard University por duna les riba tereno di educacion. Tambe pa wak con e studiantenan di Colegio EPI por “stroom door” y habri nan interes pa studia na Howard University. Sra. Danker a expresa cu Howard University ta un scol hopi interesante cu bunita historia y ta bunita pa wak kico nan ta boga p’e y Colegio EPI kier sigui coopera riba e tereno aki.

Sr. Oliver Street di Howard University ta indica cu studiantenan di rond mundo ta bonbini na Howard University y nan lo ta contento pa haya studiantenan di Aruba na Howard University. Ademas di esaki sr. Street a indica cu Howard University ta ofrece diferente beca deportivo y ta expresa cu nan ta spera di por tin e oportunidad di tin studiantenan di Aruba cu por participa den nan ekiponan deportivo y alabes haya un gran experencia academico.

Sra. Tonija Hope di Howard University a expresa cu a trata e posiblidad pa e studiantenan di Aruba, tanto riba e nivel di “undergraduate” y “master” pa por continua cu nan estudio na Howard University. Howard University ta ofrece un variedad di disciplina cu na e momento aki no tin na Aruba. Nan expectativa ta cu e studiantenan di Aruba ta bin studia na Howard University y unabes nan ricibi nan diploma nan por contribui na e desaroyo di Pais Aruba. Sra. Hope a subraya cu durante e encuentro a trata con esaki ta financieramente posibel pa e studiantenan. Tambe a trata becanan pa atleta den e disciplinanan cu Howard University ta ofrece.

Un reunion interesante y extenso, tratando pa crea oportunidad pa nos studiantenan di Aruba cu ta desea di eherce un estudio na Howard University. Aplicando e cuater (4) C-nan di habilidad di siglo 21 ta logra pa tin exito den enseñansa, cual ta comunicacion, colaboracion, pensamento critico y creatividad.

Diamars atardi, hunto cu Minister Plenipotenciario na Washington D.C. Joselin Croes nos a reuni cu Secretaria di Estado di Maryland sra. Susan Lee y sr. Joseph Gebhardt, kende ta abogado graduada di Harverd University y apunta pa Gobernador Wes Moore, como miembro di e team di transicion Workforce Development.

Sra. Susan Lee tin mas di 20 aña di experencia den Asamblea General na Maryland. Desde aña 2014, Sra. Lee ta fungi como senador. Mester agrega cu Sra. Lee tin un amplio experticio den “cyber security”, inovacion y “human trafficking”.

Durante e encuentro a trata e posibilidadnan unico pa Pais Aruba. Sra. Lee a indica cu nan ta dispuesto pa traha cu Aruba. Den e prome tres (3) lunanan di aña 2024, nan lo haci un bishita na Aruba pa firma un MoU. Sra. Susan Lee a expresa di ta contento pa crea un relacion cu Aruba ora cu firma e MoU. Sra. Lee a subraya cu tin asina hopi cu tanto Aruba y Maryland por haci hunto den colaboracion cu lo beneficia ambos pais. Ta en busca di, entre otro, cooperacion, intercambio, inversion, “life science” y “cyber security”. Sr. Joseph Gebhardt, Senior Advisor di e secretaria di estado di Maryland a expresa di ta interesa den intercambio educacional y deporte specialmente den e disciplina di baseball.

E tabata un tremendo reunion unda a trata e temanan relaciona cu educacion y deporte. Pa conclui, nos a keda hopi contento y positivo cu e reunion directo aki cu Estado di Maryland. Sigur un reunion unda cu lo bay cosecha hopi fruta den futuro cercano trahando den colaboracion cu secretaria di estado di Maryland.

Durante e biahe di trabou Minister di Enseñansa a haci tambe un bishita oficial na University of Maryland Baltimore County (UMBC). Parti mainta a reuni cu e staf y dr. Antonio Moreira di UMBC University.

Durante e encuentro aki a trata, entre otro, e posibilidadnan pa “In-state tuition”, colaboracion di programa di intercambio pa alumno y docente y programa di investigacion riba temanan di interes pa Aruba. Mester agrega cu UMBC University tin un programa atletico hopi amplio den e prome division. Tambe, ta explorando e posibilidad pa nos studiantenan haci nan “Associate Degree” na Aruba via Colegio EPI y despues por continua na e UMBC University pa den 2 aña obtene nan “Bachelor’s Degree”. E conocido sistema 2+2. Adicionalmente, nos a informa cu a yega na un acuerdo cu Montgomery College, unda cu EPI den futuro ta bay duna un “Associate Degree” cuminsando cu ICT. Como cu UMBC University tin un acuerdo cu Montgomery College, ta facilita e trabou pa por logra esaki.

Despues di e encuentro ameno, nos a haci un recorido di e campus y universdidad cu ta number un (1) den diferente tecnologia na Merca. Pues, pronto den e prome kwartaal di aña 2024 lo anuncia e avance di locual a logra, den cual sigur lo habri posibilidadnan nobo pa nos studiantenan.

Sr. Antonio Moreira, kende ta “Vice Provost for Academic Affairs” di UMBC University a indica cu e universidad ta relitavamente nobo y a wordo funda na aña 1966. Actualmente, nan tin alrededor di 14 mil studiante, 11 mil “undergraduate” y mas di 3 mil studiante di Masters y PhD.

UMBC University ta enfoca den programanan cu ta clave pa e pais y necesario mundialmente, den area di ciencia y ingenieria, tecnologia, medio ambiente y atencion medico. UMBC University ta prepara su studiantenan pa ta ciudadano competente y pa marca un diferencia mientras cu nan ta eherciendo nan estudio eynan.

Sr. Moreira a expresa cu nan ta contento di ricibi nos. Durante e reunion nos a dialoga tocante intercambio di studiante di Universidad di Aruba y UMBC University, buscando pa desaroya programa cu por contribui den e areanan unda tin necesidad. Sr. Moreira a indica cu tin diferente programa cu lo ta beneficioso pa tanto Aruba, como UMBC University y ta contento di por traha den colaboracion cu Aruba y hunto marca un diferencia den e region y mundo. Pa conclui, nos ta hopi contento y pronto e colaboracion y cooperacion cu UMBC University lo ta concretisa a traves di un MoU.

Durante e biahe di trabou a haci un bishita oficial na University of South Carolina. Aruba pa basta aña tin un relacion estrecho cu University of South Carolina.

Durante e biahe aki, a firma un acuerdo unda a logra brinda ocho (8) of dies (10) studiante e oportunidad pa haci nan Master’s Degree den Sport & Event Management.

E di dos logro ta cu e “undergraduates” cu tabata bay University of South Carolina pa haci nan Bachelor’s Degree tabata haya nan “in-state tuition”, pero ora cu continua pa obtene nan Master’s Degree nan mester a paga e tarifa di scol completo. A logra yega na un acuerdo cu ora nan finalisa nan Bachelor’s Degree y kier continua cu un Master’s Degree na University of South Carolina e “In-state tuition” ta valido pa nan.

E delegacion di Aruba a haya un recorido di e universidad y tabatin e oportunidad pa dialoga cu e staf di University of South Carolina. Minister Plenipotenciario na Washington D.C. sra. Joselin Croes a indica cu esaki ta un dia grandi pa Aruba, unda cu a logra firma un MoU cu University of South Carolina pa asina nos studiantenan cu kier haci nan Master’s Degree tambe haya un “in-state tuition fee”. Pues, na tur e studiantenan cu ta eherciendo nan estudio caba cu ta desea ta continua cu nan Master’s Degree eynan mes, por haci esaki awo na un suma hopi mas atractivo. A logra reduci e prijs di 45 mil dollar pa 15 dollar. Minister Plenipotenciario Sra. Joselin Croes ta indica cu nan a traha hopi duro pa esaki y ta sumamente contento cu e resultado. Minister Plenipotenciario Sra. Joselin Croes ta gradici Minister Endy Croes cu a logra firma e acuerdo aki pa nos studiantenan di Aruba.

Chris Reid di University of South Carolina a indica cu nan ta yuda e studiantenan establece eynan y nan t’ey pa yuda e studiante durante ful nan estudio eynan. No solamente cu e parti academico, pero tambe nan t’ey pa yuda e studiantenan cu entre otro imigracion, pa haya e documentonan necesario pa haya Visa, cu tur preparacion y guia cu e studiantenan mester na yegada, seguro medico, problema di vivienda y cuestion legal. Pues nan por yuda cu e studiantenan den locual nan mester, sea ta cuestion personal of academico.

Dr. Robin Dipietro, kende ta profesor di University of South Carolina a indica cu desde aña 2005, nan tin un contato cu Aruba unda cu nan ta brinda asistencia den diferente programa y/of curso. University of South Carolina tin un tremendo facultad cu alrededor di 100 estudio, mas di 37 mil studiante y 5 mil miembro di facultad. Ademas, nan tin diferente programa deportivo cu ta extraordinario.

Durante e biahe di trabou na Merca a asisti na e Sport Entertainment & Venues Tomorrow (SEVT) Conference di University of South Carolina (USC).

E ekipo di Universidad di Aruba hunto cu ekipo di University of South Carolina ta haciendo un investigacion profundo encuanto deporte, entre otro e infrastructura di deporte, e percepcion di Pueblo di Aruba pa deporte y kico ta nifica deporte recreacional y competitivo. Durante e mainta aki, e ekipo di profesional a presenta e prome fase di resultado di e investigacion. A dialoga cu e team pa sigura cu e rapport ta cla otro aña april, cual lo ta un direccion nobo pa Aruba den deporte.

Sra. Jo-Anne Croes di Universidad di Aruba a expresa cu e investigacion aki ta duna un bista di e tendencianan actual den “sport management”. Cu e investigacion aki por mira e balor percibi di deporte na Aruba. Esaki ta e prome parti di un “national study” cu lo tuma luga na januari proximo y asina evalua kico ta e beneficionan econimico cu deporte ta trece pa un pais.

Sra. Sue Ann Lee di Universidad di Aruba a indica cu a invita nos pa e presentacion pa hunto explora e potencial di deporte, con por trece deporte den un nivel academico y evalua con ta integr’e den e facultad. Di e forma aki eleva e percepcion di deporte na Aruba y contribui na e desaroyo di deporte di Aruba den su totalidad.

Profesor Andy Gillentine a expresa di ta contento di por duna bek na Aruba y cu e ta considera Aruba su segundo hogar. Profesor Andy ta trahando pa diestres (13) aña cu Universidad di Aruba. Profesor Andy a bishita e diferente facilidadnan deportivo na Aruba tanto pa deporte recreacional y competitivo y ta mira e oportunidadnan cu Aruba ta ofrece. E programa di certificacion ta yuda desaroya e proximo generacion di deporte profesional. Esaki sigur lo yuda Aruba pa genera ingreso, lo beneficia salud di e habitantenan di Aruba y asina eleva deporte na Aruba.

Sr. Steven, kende ta Sport Faculty Member y Sport & Entertainment Management di University of South Carolina a expresa di ta sumanente contento di por yama nos y e delegadonan di Universidad di Aruba bonbini na e Sport Entertainment & Venues Tomorrow (SEVT) Conference. E conferencia ta trece e lidernan den deporte y entretenimento hunto unda nan ta dialoga, analisa y presenta ideanan di e industria di entretenimento. E encuentro aki sigur ta brinda e oportunidad pa conoce un poco mas di Aruba. E programa di certificacion ta brinda oportunidad pa engrandece conocemento di “sport management”, pa asina por opera evento y facilidadnan deportivo. Durante e curso lo trata e topiconan manera, maneho, finansa, operacion di negoshi, sponsorship y mercadeo. Esaki sigur lo yuda desaroya deporte na un otro nivel. Finalmente, nos ta gradici e team di Universidad di Aruba cu e trabou cu nan ta haciendo y ta felicita nan cu e tremendo presentacion di e prome parti di e resultado.