Minister Bussemaker di bishita na IPA
Recientemente Instituto Pedagogico Arubano (IPA) a yama bon bini na Minister Bussemaker, encarga cu maneho di Enseñansa, Cultura y Ciencia na Hulanda. E tabata di bishita riba nos isla pa mantene su mes al tanto di e ultimo desaroyonan cu ta forma parti di e trabaonan haci conhuntamente den Reino.
 |
Durante e bishita na IPA e directora general sra. Marilyn Richardson a expresa di ta hopi contento cu e bishita di e mandatario Hulandes unda a duna IPA un chens di demostra tur e trabaonan cu nan a bin ta haciendo pa e desaroyo di educacion na Aruba pero tambe riba nivel di reino Hulandes y internacionalmente. |
A duna un presentacion di IPA, unda cu a mustra cu dato y cifra e desaroyonan cu ta trahando riba nan y a enfoca hopi riba e parti di investigacion como tambe e trabaonan den cooperacion cu partnernan den reino cu a haci riba tereno di formacion di maestro na St. Eustatius. E ultimo aki tabata un di e peticionnan y tareanan for di Hulanda cu IPA a ehecuta den cuadro di e proyecto Maestro Kompas hunto cu Open Universiteit y Hogeschool Utrecht.
Desde cu a introduci e islanan BES den Reino a constata cu e necesidad tabata grandi pa loke ta desaroyo den educacion y especialmente riba e area di formacion y certificacion di maestro na Boneiro, Saba y St. Eustatius. For di IPA a ofrece un programa “custom made” pa formacion di maestronan di Enseñansa Primario (PABO) den e formato yama “blended learning”. Pronto e studiantenan lo termina nan estudio den un combersacion y presentacion final y lo por otorga e diplomanan.
 |
Fuera di a brinda hopi informacion riba tur loke IPA ta haciendo na e momentonan aki y tambe riba e plannan pa futuro, e instituto a presenta un mini exposicion unda pa medio di posters y filmnan cortico e delegacion Hulandes por a haya un miho bista riba e trabaonan andando riba e tereno di investigacion den enseñansa. Un di e desaroyonan andando ta e scolnan multilingual y Minister Bussemaker a haya e oportunidad pa dialoga cu e investigado lider di e proyecto aki.
E bishita y intercambio tabata uno hopi positivo y Ministerio di Enseñansa di Hulanda ta mira IPA como un partner importante den regio pa sigui colabora riba proyectonan cu por beneficia e islanan BES y tambe e cooperacion den reino den su totalidad.
Info / Contact
Pa mas informacion por busca den e alfabet menu riba homepage: [I] Instituto Pedagogico Arubano (IPA) of por tuma contacto cu IPA
Scroll To Top
