World Autism Awareness Day na Scol Dununman
Dia 2 di april Minister di Enseñansa, Ciencia y Desaroyo Sostenibel dr. Armando Lampe a haci un bishita na Scol Dununman pa celebra Dia Internacional di conscientisacion pa cu Autismo (World Autism Awareness Day).
Conhuntamente cu Minister President sra. Evelyn Wever-Croes, colega Minister sr. Dangui Oduber, como tambe algun mayor, a presencia e celebracion, cu tabata uno cu hopi amor y cariño di esnan presente.
Despues di canto, declamacion di poesia y diferente speech, e invitadonan por a sinta y mira un video cu a wordo prepara specialmente pa e dia aki.
Representantenan di La Cabana Resort cu tambe tabata presente a keda impresiona cu e presentacion completo y a vocifera cu nan sigur lo kier sigui coopera y duna mas ainda, pa yuda den e desaroyo di tur e studiantenan di Scol Dununman.
Minister Lampe a informa cu e ta trahando na formalisacion di e continuidad di estudio pa cu e muchanan di Scol Dununman, cu despues di nan 16 aña di edad lo mester yega final di nan periodo di estudio na dicho scol.
Tur esnan presente a keda hopi contento di e mainta cu sigur a funciona como un conscientisacion personal y cu nan lo purba di sigui haci nan esfuerso pa transmiti e mesun amor y devocion cu e maestro y staff di Scol Dununman a presenta, sperando cu hopi mas hende lo sigui coopera cu e scol y su metanan pa cu nos muchanan special.
Fuente: Facebook page Armando Rudy Lampe – Minister Enseñansa, Ciencia, Desaroyo Sostenibel
Info / Contact
Pa mas informacion [M] Ministerio di Enseñansa den e alfabet menu riba homepage of por tuma contacto cu Ministerio di Enseñansa
Scroll To Top
